واشنگٹن : امریکیوں کی اکثریت نے غزہ میں فلسطینی شہریوں کو ہونے والے نقصانات کو روکنے اور جنگ کو فوری طور پر ختم کرنے کی اپیل کی ہے۔
برطانوی خبر رساں ادارے رائٹرز نے امریکا میں کرائے گئے سروے کی رپورٹ میں بتایا ہے کہ امریکا کی اکثریت جن کا تعلق ریپبلکن اور ڈیموکریٹک دونوں جماعتوں سے ہے چاہتی ہے کہ امریکا غزہ میں فلسطینی شہریوں کو ہونے والے نقصانات کو روکنے میں مدد کرے اور اسرائیل کی طرف سے حماس کے خلاف چھیڑی گئی جنگ ختم کی جائے۔
2 دن تک جاری رہنے والے سروے کے نتائج سے ظاہر ہوتاہےکہ 78 فیصد شرکا جن میں 94 فیصد ڈیموکریٹس اور 71 فیصد ریپبلکن شامل ہیں نے اس بیان سے اتفاق کیا کہ امریکی سفارت کاروں کو فعال طور پر ایک منصوبے پر کام کرنا چاہیےجس میں شہریوں کو غزہ میں لڑائی چھوڑ کر دوسرے ملک جانے کی اجازت دی جائے۔
22 فیصد افراد نے نے اس رائے سے اختلاف کیا۔ سروے کے مطابق تنازعہ میں اسرائیل کے موقف کے لیے امریکی شہریوں کی حمایت 2014 کی رائے شماری کے مقابلے میں زیادہ تھی۔
نئی رائے شماری میں 81 فیصد شرکا نے اس بیان سے اتفاق کیا کہ اسرائیل کو حماس کے خلاف اپنے انتقامی حملوں میں شہریوں کو ہلاک کرنے سے گریز کرنا چاہیے اور 19 فیصد نے اس بیان سے اختلاف کیا۔
41فیصد شرکانے کہا کہ وہ اس بیان سے متفق ہیں کہ حماس کے ساتھ تنازع میں امریکاکو اسرائیل کا ساتھ دینا چاہیے اور 2 فیصد نے کہا کہ امریکا کوفلسطینیوں کی حمایت کرنی چاہیے۔
سال 2014کے تنازعے کے دوران کرائے گئے رائٹرز کے سروے میں 22 فیصد شرکاء نے کہا تھا کہ امریکا کو اسرائیلی موقف کی حمایت کرنی چاہیے اور 2 فیصد نے فلسطینی موقف کی حمایت کی تھی۔
سروے میں اسرائیل کے موقف کے لیے ریپبلکنز کی حمایت 54 فیصد رہی،اسرائیلی پوزیشن کے لیے ڈیموکریٹس کی حمایت 37 فیصد رہی۔ 27 فیصد نے کہا کہ امریکا کو ایک غیر جانبدار ثالث ہونا چاہیے اور 21 فیصد نے کہا کہ امریکا کو بالکل مداخلت نہیں کرنی چاہیے۔
40سال سے کم عمر کے 40 فیصد جواب دہندگان نے کہا کہ امریکا کو ایک غیر جانبدار ثالث ہونا چاہیے۔ سروے میں 1003 افراد نے حصہ لیا۔
