The news is by your side.

Advertisement

بھارت نےمقبوضہ کشمیرکی خصوصی حیثیت ختم کردی

بھارتی صدرنےآرٹیکل 370ختم کرنےکےبل پردستخط کردیے

نئی دہلی : بھارت نے مقبوضہ کشمیرکی خصوصی حیثیت ختم کردی اور بھارتی صدر نے آرٹیکل 370 ختم کرنے کے بل پر دستخط کر دیے۔

تفصیلات کے مطابق مقبوضہ کشمیرکی صورتحال پربھارتی پارلیمنٹ کااجلاس ہوا، بھارتی وزیراعظم نریندر مودی پارلیمنٹ کے اجلاس میں شریک ہوئے۔

بھارتی وزیرداخلہ امیت شاہ نے مقبوضہ کشمیر سے متعلق اہم بیان دیتے ہوئے مقبوضہ کشمیرسے متعلق آرٹیکل 370 کی ایک کے سوا تمام شقیں ختم کرنے کا اعلان کیا۔

بھارتی وزیرداخلہ نے آرٹیکل370 ختم کرنے کا بل پیش کردیا، تجویز کے تحت غیر مقامی افراد مقبوضہ کشمیر میں سرکاری نوکریاں حاصل کرسکیں گے اور 370 ختم ہونے سے مقبوضہ کشمیرکی خصوصی حیثیت ختم ہوجائےگی۔

بعد ازاں بھارتی صدر نے آرٹیکل 370 ختم کرنے کے بل پر دستخط کر دیے اور گورنر کاعہدہ ختم کرکے اختیارات کونسل آف منسٹرز کو دے دیئے، جس کے بعد مقبوضہ کشمیرکی خصوصی حیثیت ختم ہوگئی۔

خیال رہے آرٹیکل تین سو ستر مقبوضہ کشمیرکوخصوصی درجہ دیتے ہوئے کشمیر کو بھارتی آئین کا پابند نہیں کرتا، مقبوضہ کشمیر جداگانہ علاقہ ہے، جسے اپنا آئین اختیارکرنے کا حق حاصل ہے۔

دوسری جانب بھارتی اپوزیشن کا ایوان میں احتجاج کرتے ہوئے حکومت کا فیصلہ ماننے سے انکار کردیا ہے۔

بھارتی وزیرداخلہ کی تقریر کے دوران اپوزیشن نے احتجاج کرتے ہوئے کہا تھا کہ مودی سرکارنے آرٹیکل35 اے ختم کیا تومخالفت کریں گے جبکہ کانگریسی رہنما کا کہنا ہے کہ بی جے پی نے مقبوضہ کشمیر سے متعلق قانون پر مشورہ نہیں کیا۔

اس سے قبل مقبوضہ کشمیر کی صورتحال پر بھارتی وزیراعظم کی زیرصدارت کابینہ اجلاس ہوا تھا ، اس موقع پر بھارت کی متعدد ریاستوں میں ہائی الرٹ جاری کردیا گیا تھا۔

دوسری جانب کانگریس اوردیگراپوزیشن جماعتوں نے اعلان کیا ہے کہ وزیرداخلہ کےبیان کے بعد لائحہ عمل دیں گے، مقبوضہ کشمیر میں جغرافیائی یا کوئی اورتبدیلی کی تو بھارتی صدر سے بات کریں گے۔

مزید پڑھیں : قابض بھارتی فوج نے سری نگرمیں غیراعلانیہ کرفیو لگا دیا

یاد رہے مقبوضہ کشمیرمیں صورتحال انتہائی کشیدہ ہے ، لوگ گھروں میں محصورہوکررہ گئے، کشمیری رہنما محبوبہ مفتی،عمرعبداللہ اورسجاد لون سمیت دیگر رہنماؤں کوبھی نظربند کردیاگیا ہے۔

مقبوضہ وادی میں دفعہ ایک چوالیس نافدکر کےوادی میں تمام تعلیمی اداروں کو تاحکم ثانی بنداور لوگو ں کی نقل وحرکت پربھی پابندی عائد کردی گئی ہے، سری نگر سمیت پوری وادی کشمیرمیں موبائل فون،انٹرنیٹ،ریڈیو، ٹی وی سمیت مواصلاتی نظام معطل کردیاگیا ہے جبکہ بھارتی فورسز کےاہلکاروں نےپولیس تھانوں کا کنٹرول سنبھال لیا ہے۔

Comments

comments

یہ بھی پڑھیں