ممبئی: بھارت کے ناگپور پولیس کا کہنا ہے کہ انہیں ایک نامعلوم افراد کی جانب سے کال موصول ہوئی جس نے امیتابھ بچن اور دھرمیندر اور تاجر مکیش امبانی کے بنگلوں کو بم سے اڑانے کی دھمکی دی۔
بھارتی میڈیا کے مطابق نامعلوم شخص نے ناگپور پولیس کنٹرول روم فون کر کے امیتابھ بچن، دھرمیندر اور مکیش امبانی کے بنگلوں کو بم سے اڑانے کی دھمکی دی ہے جس کے بعد ناگپور پولیس نے ممبئی پولیس کو اس حوالے سے اطلاع دی۔
بھارتی میڈیا کا کہنا ہے کہ ممبئی پولیس کال کرنے والے کو ٹریس کرنے کی کوشش کر رہی ہے، اس کے علاوہ تینوں شخصیات کے بنگلوں پر سرچ آپریشن کیا گیا اور اس دوران بم ڈسپوزل اسکواڈ کو بھی طلب کیا گیا۔
رپورٹس کے مطابق سرچ آپریشن کے دوران تینوں شخصیات کے بنگلوں اور اردگرد سے کوئی خطرناک چیز برآمد نہیں ہوئی۔
View this post on Instagram
بھارتی میڈیا کے مطابق امیتابھ بچن ممبئی میں پانچ پرتعیش گھروں کے مالک ہیں۔ فی الحال پورا بچن خاندان جلسہ میں مقیم ہے۔ دوسری جانب دھرمیندر جوہو میں ایک بنگلے میں رہتے ہیں۔
دوسری جانب سپریم کورٹ نے بھارتی حکومت سے کہا ہے کہ وہ تاجر مکیش امبانی اور ان کے خاندان کے لیے Z+ سیکورٹی فراہم کرے۔
سپریم کورٹ نے اپنے حکم میں کہا کہ ان کی سیکورٹی نہ صرف ممبئی میں بلکہ پورے ملک اور بیرون ملک میں دستیاب کرائی جانی چاہئے جس کا خرچہ مکیش امبانی برداشت کریں گے۔
