کراچی : مقتول امجد صابری کے بھائی ثروت فرید صابری نے کہا ہے کہ انہیں قانون نافذ کرنے والے اداروں پر مکمل اعتماد ہے اورامید رکھتے ہیں کہ بھائی کے قتل کا کوئی نہ کوئی پہلو ضرور نکلے گا اور قاتل گرفتار ہوں گے۔
ان خیالات کا اظہارانہوں نے اپنی رہائش گاہ پر میڈیا سے گفتگو کرتے ہوئے کیا، ثروت صابری کا کہنا تھا کہ قانون نافذ کرنے والے ادارے امجد صابری کے قتل کیس پر مختلف زاویوں سے تحقیقات کررہے ہیں اورانہیں جلد انصاف ملنے کی امید ہے۔
انہوں نے بتایا کہ امجد صابری کا چہلم 28 جولائی جمعرات کو ان کی رہائش گاہ پر منعقد ہوگا ، جس میں ایک لاکھ لوگوں کی شرکت کے انتظامات کیے گئے ہیں۔
انہوں نے بتایا کہ نماز ظہر تا عصر قرآن خوانی اور عصر تا مغرب فاتحہ خوانی اور چادر چڑھائی جائے گی اورمغرب تا عشاء محفل نعت خوانی اور بعد ازعشاء محفل سماع منعقد کی جائے گی۔
ثروت صابری کے مطابق محفل سماع میں امجد صابری کے بھائی عظمت صابری اور طلحہ صابری اپنے فن کا مظاہرہ کریں گے۔