The news is by your side.

تاخیری حربوں کے ذریعے میرے موکل کو عدالت میں پیش ہونے سے روکا جا رہا ہے، عماد یوسف کے وکیل

کراچی : اے آر وائی نیوز کے ہیڈ آف نیوز عماد یوسف کے وکیل نعیم قریشی عدالت میں پیش ہوئے اور بتایا کہ میرے موکل کوغیر قانونی طور پر رکھا گیا ہے۔

تفصیلات کے مطابق اے آر وائی نیوز کے ہیڈ آف نیوز عماد یوسف کی گرفتاری کے معاملے پر وکیل نعیم قریشی عدالت میں پیش ہوئے۔

وکیل نعیم قریشی نے عدالت کو بتایا کہ پولیس کی جانب سے گزشتہ رات گرفتار کیا گیا ، تاخیری حربوں کے ذریعے عدالت میں پیش ہونے سے روکا جا رہا ہے۔

عماد یوسف کے وکیل کا کہنا تھا کہ میرے موکل کوغیر قانونی طور پر رکھا گیا ہے، مقدمہ اس شہر کا بنتا ہی نہیں، پولیس نے تاحال بھی ایف آئی آر عدالت نہیں پہنچائی۔

جس پر عدالت نے کہا کہ پولیس نے تاخیری حربے استعمال کیےتو ان سےپوچھیں گے ، وکیل نعیم قریشی کا کہنا تھا کہ آپ جوڈیشل مجسٹریٹ ہیں آپ کا اختیار ہے، پولیس کو پابند کریں، انسانیات بھی کوئی چیز ہوتی ہے۔

عدالت نے کہا کہ دیکھتے ہیں پولیس نے تاحال ایف آئی آرکیوں نہیں پیش کی، بعد ازاں سماعت میں کچھ دیر کا وقفہ دے دیا گیا۔

یاد رہے اے آروائی کےہیڈ آف نیوزعماد یوسف کو کراچی میں ڈیفنس سے رات گئے گرفتارکر لیا گیا تھا۔

پندرہ سے بیس افراد نے عماد یوسف کے گھر پر دھاوا بولا اور سی سی ٹی وی کیمروں کا رخ موڑ دیا، اس دوران چادر اور چاردیواری کا تقدس پامال کرتے ہوئے دروازے توڑ کر گھر میں گھسے اور توڑ پھوڑ مچائی۔

چھاپہ مار ٹیم میں نہ کوئی خاتون اہلکار تھی اور نہ ہی وارنٹ گرفتاری دکھایا گیا۔

Comments

یہ بھی پڑھیں