لندن : جمال خاشقجی کو خراج تحسین پیش کرنے کےلیے غیر سرکاری تنظیم کے کارکنوں نے سعودی سفارت خانے کی شاہراہ کا نام تبدیل کرکے ’خاشقجی اسٹریٹ رکھ دیا۔
تفصیلات کے مطابق انسانی حقوق کے لیے کام کرنے برطانیہ کی غیر سرکاری تنظیم ایمنسٹی انٹرنیشنل کے کارکنوں نے مقتول صحافی جمال خاشقجی کو خراج تحسین پیش کرنے کے لیے جمعے کے روز دارالحکومت لندن میں واقع سعودی سفارت خانے کی سڑک کو ’خاشقجی اسٹریٹ‘ کے نام سے منسوب کردیا۔
مقامی خبر رساں ادارے کا ادارے کا کہنا تھا کہ این جی او کارکنان کی جانب سے یہ اقدام جمال خاشقجی کی سفارت خانے میں بہیمانہ موت کا ایک ماہ مکمل ہونے پراٹھایا گیا ہے۔
برطانوی این جی او ایمنسٹی انٹرنیشنل کی مہم چلانے والی مینیجر کرسٹائن بینیدکٹ کا کہنا تھا کہ سعودی سفارت خانے میں قتل ہونے والے صحافی جمال خاشقجی کے اہل خانہ اور دوستوں سے اظہار یکجہتی کے لیے فوری اقدام تھا۔
ان کا کہنا تھا کہ خاشقجی کے قریبی دوستوں اور اہل خانہ نے کارکنوں پر ان ریاستوں میں احتجاج کرنے کے لیے زور دیا جو سعودی عرب کی قریبی اتحادی ہیں۔
کرسٹائن کا کہنا تھا کہ ہمیں امید ہے کہ ہماری یہ مہم باعث بنے گی کی اقوام متحدہ اس قتل کی تحقیق کرے کیوں کہ سعودی حکومت خود اپنی تفتیش کرنے کےلیے بھروسہ نہیں کیا جاسکتا۔
خیال رہے کہ ترک صدر طیب اردوگان نے ترک صدر اردوگان نے براہ راست سعودی حکومت کو قصور وار ٹہراتے ہوئے کہا تھا کہ ’لاش کے صرف ٹکڑے ہی نہیں کیے گئے بلکہ اسے ٹھکانے لگانے کے لیے تیزاب کا استعمال کیا گیا‘۔
ترک تفتیش کار کا بیان۔
یاد رہے کہ چند روز قبل ترک پراسیکیوٹر جنرل نے دعویٰ کیا ہے کہ سعودی صحافی جمال خاشقجی کو سعودی قونصل خانے میں گلا دبا کر قتل کردیا گیا تھا اور پھر ان کی لاش کو ٹھکانے لگادیا گیا۔
سعودی صحافی جمال خاشقجی کو کب اور کہاں قتل کیا گیا؟
واضح رہے کہ سعودی صحافی جمال خاشقجی دو اکتوبر کو استنبول میں سعودی قونصل خانے میں جانے کے بعد سے لاپتہ تھے، ترک حکام نے دعویٰ کیا تھا کہ خاشقجی کو سعودی قونصل خانے میں ہی قتل کرکے ان کی لاش کے ٹکڑے کردئیے گئے ہیں۔
