اسلام آباد : وزیر مذہبی امور کی ہدایات پر قربانی کی رقم عازمین کے بینک اکاؤنٹس میں منتقل کردی گئی، اسپانسر شپ اسکیم کے عازمین متعلقہ بینکوں سے کیش وصول کرسکیں گے۔
تفصیلات کے مطابق ترجمان مذہبی امور کی جانب سے بیان میں کہا گیا ہے کہ پاکستانی عازمین حج کی سعودی عرب آمد جاری ہے ، 5پروازوں کے ذریعے 1200سے زائدعازمین مدینہ منورہ پہنچائے گئے۔
ترجمان کا کہنا تھا کہ پیرکی رات تک 4 پروازوں سےمزید 1390عازمین مدینہ پہنچے، منگل کو 3 ہزار سے زائد عازمین 9 حج پروازوں سے مدینہ پہنچیں گے، حاجی کیمپوں میں حفاظتی ویکسین کا عمل ہفتہ وار چھٹیوں میں بھی جاری رہا۔
وزیرمذہبی امور کی ہدایات پر قربانی کی رقم عازمین کے بینک اکاؤنٹس میں منتقل کردی ہے ، اسپانسر شپ اسکیم کے عازمین متعلقہ بینکوں سےکیش وصول کرسکیں گے۔
ترجمان نے کہا کہ عازمین اپنی پرواز سے 24 گھنٹے قبل متعلقہ حاجی کیمپس پہنچیں، عازمین حاجی کیمپس سے پاسپورٹ، ویزہ اور فضائی ٹکٹ حاصل کریں۔
ان کا کہنا تھا کہ عازمین رہنمائی کیلئےوزارت کی ہیلپ لائنز،ویب سائٹ سےمددحاصل کریں، مدینہ کے رہائشی ہوٹلز میں پاکستانی پرچم والی جیکٹ پہنے معاونین رہنمائی کیلئے 24 گھنٹے موجود ہے، حج مشن مدینہ کی نئی بلڈنگ میں کنٹرول آفس قائم کردیاگیا ہے۔
