The news is by your side.

Advertisement

اے این ایف نے رانا ثنا اللہ کو حراست میں لے لیا، نا معلوم مقام پر منتقل

لاہور: پاکستان مسلم لیگ ن کے رہنما اور سابق وزیر قانون پنجاب رانا ثنا اللہ کو اینٹی نارکوٹکس فورس (اے این ایف) نے حراست میں لے لیا۔

تفصیلات کے مطابق لیگی رہنما رانا ثنا اللہ کو اے این ایف نے حراست میں لے لیا ہے، اے این ایف کے ترجمان نے حراست میں لیے جانے کی تصدیق کر دی۔

ذرایع کا کہنا ہے کہ اے این ایف نے رانا ثنا اللہ کو تفتیش کے لیے نا معلوم مقام پر منتقل کر دیا ہے۔

ذرایع کا کہنا ہے کہ اے این ایف نے رانا ثنا اللہ کو سکھیکی کے قریب سے حراست میں لیا، اینٹی نارکوٹکس فورس نے یہ کارروائی منشیات فروشوں کے خلاف حالیہ آپریشن کے بعد کی ہے۔

رانا ثنا اللہ کے اہل خانہ نامعلوم مقام پر منتقل ہو گئے، اہلیہ، بیٹی، داماد اور بچے 3 گاڑیوں پر گھر سے روانہ ہوئے، داماد احمد شہریار کو رانا ثنا کا سیاسی جانشین سمجھا جاتا ہے، رانا ثنا کے خاندان کی گھر سے روانگی کی فوٹیج اے آر وائی نیوز کو موصول ہو گئی۔

ترجمان اے این ایف نے بتایا کہ رانا ثنا اللہ کو ریجنل ڈائریکٹوریٹ پنجاب نے موٹر وے سے حراست میں لیا، گرفتاری سے متعلق تفصیلات جلد جاری کی جائیں گی۔

رانا ثنا اللہ کو ریجنل ڈائریکٹوریٹ لاہور یا پنڈی منتقل کیے جانے کا امکان ہے، ذرایع کا کہنا ہے کہ لیگی رہنما کا منشیات کے اسمگلروں کے ساتھ تعلقات کا انکشاف ہوا ہے، اسمگلرز فیصل آباد میں رانا ثنا کے ڈیرے پر بھی پناہ لیتے تھے، رانا ثنا و دیگر افراد کی تفتیش بریگیڈیئر خالد محمود کریں گے۔

ذرایع نے بتایا کہ رانا ثنا اللہ کی گرفتاری منشیات اسمگلر کے تفتیش میں نام اگلنے کے بعد عمل میں آئی ہے، اے این ایف شام تک تفتیشی رپورٹ اعلیٰ حکام کو بھجوائے گی، منشیات اسمگلرز کو گرین سگنل دینے سے لاہور سے اہم گرفتاریاں متوقع ہیں، رانا ثنا کے قریبی ساتھیوں کو بھی اے این ایف گرفتار کرے گی۔

Comments

یہ بھی پڑھیں