ہالی وڈ کی مشہور اداکارہ انجلینا جولی نے غزہ کے ساتھ پھر اظہار یکجہتی کردیا، سوشل میڈیا پر فلسطینیوں کے حق میں پوسٹ شیئر کردی۔
عالمی شہرت یافتہ اداکارہ اور اقوامِ متحدہ کی سابق خصوصی سفیر اداکارہ انجلینا جولی نے سوشل میڈیا پر ڈاکٹرز وِد آؤٹ بارڈرز کی غزہ پر رپورٹ شیئر کی ہے۔
اس رپورٹ میں غزہ کی موجودہ صورتحال کو فلسطینیوں اور ان کی مدد کرنے والوں کے لیے اجتماعی قبر قرار دیا گیا ہے۔
رپورٹ کے مطابق اسرائیل فلسطینیوں کی زندگیاں منظم طریقے سے تباہ کر رہا ہے، اسرائیلی فوج کی کارروائیوں سے انسانی امداد فراہم کرنے والے کارکنوں اور طبی ورکرز بھی محفوظ نہیں۔
رپورٹ میں اسرائیلی حکام سے مطالبہ کیا گیا کہ وہ فوری طور پر "غیر انسانی اور جان لیوا محاصرہ” ختم کریں اور فلسطینیوں، طبی عملے اور امدادی کارکنوں کی جانوں کا تحفظ یقینی بنائیں۔
یاد رہے کہ اداکارہ انجلینا جولی دو دہائیوں تک اقوام متحدہ کے ادارہ برائے مہاجرین کی خیرسگالی سفیر اور خصوصی نمائندہ رہ چکی ہیں۔
مزید پڑھیں : انجلینا جولی نے غزہ میں فوری جنگ بندی کا مطالبہ کردیا
یاد رہے کہ اس سے قبل بھی ہالی وڈ اداکارہ اور انسانی حقوق کی کارکن انجلینا جولی نے غزہ میں فوری جنگ بندی کا مطالبہ کیا تھا۔
انجلینا نے کہا تھا کہ اسرائیل میں جو واقعہ پیش آیا وہ اس بات کا جواز نہیں کہ غزہ کی شہری آبادی پر بمباری کی جائے، غزہ کی امدادی ضروریات کو چند ٹرکوں کے ذریعے پورا نہیں کیا جاسکتا۔
ہالی ووڈ اداکارہ نے کہا کہ غزہ کے شہریوں کے پاس کہیں اور جانے کے لیے جگہ نہیں، نہ خوراک تک ان کی رسائی ہے اور نہ ہی ان لوگوں کے پاس سرحد پار کر کے پناہ لینے کا بنیادی انسانی حق موجود ہے۔
آسکرایوارڈ یافتہ اداکارہ نے کہا کہ غزہ میں ایندھن اور پانی کی فراہمی روکنا وہاں کے لوگوں کے لیے اجتماعی سزا ہے۔
