میلبورن: آسٹریلیا میں اسنارکلنگ کے دوران ایک ماہر ارضیات کو آکٹوپس نے غصے میں آ کر زخمی کر دیا۔
تفصیلات کے مطابق ایک نوجوان ماہر ارضیات لانس کارلسن آسٹریلیا کے جیوگراف بے کے ساحل پر اسنارکلنگ (ڈائیونگ ماسک کے ساتھ پیراکی) کر رہے تھے، کہ ان کا سامنا ایک آکٹوپس سے ہو گیا۔
لانس کارلسن کا کہنا تھا کہ انھوں نے پانی میں ایک چیز دیکھی، جسے وہ اسٹنگ رے مچھلی سمجھے، وہ پانی سے چھلانگ لگا کر ان کی جانب بڑھی، اور انھوں نے اس کی ویڈیو بنا لی۔
آکٹوپس غصے میں دکھائی دے رہا تھا، ایک ایسے وقت جب کارلسن پانی میں کیکڑوں کے خول کے ڈھیر کو دیکھ رہے تھے، اچانک آکٹوپس نے ان پر حملہ کر دیا، پہلے اس نے کارلسن کے بازو پر وار کیا، اور پھر گردن اور کمر کے اوپر والے حصے پر حملہ کیا۔
آکٹوپس کے حملے سے لانس کارلسن کے جسم پر تکلیف دہ سرخ نشان بن گئے تھے، جو کارلسن کے مطابق ان پر کولا ڈالنے کے بعد ہی کچھ بہتر ہوئے۔
کارلسن کا کہنا تھا اچانک انھیں اپنے الٹے بازو پر سرسراہٹ محسوس ہوئی اور ساتھ ہی ان کی گردن اور کمر پر کوڑے کی طرح کوئی شے لگی۔
کارلسن کے مطابق وہ بہت خوف زدہ ہو گئے تھے، کیوں کہ آکٹوپس خطرے کی صورت میں پانی میں سیاہی خارج کرتا ہے، اور اس نے ایسا ہی کیا تھا، لیکن اس واقعے میں آکٹوپس نے ان پر حملہ بھی کیا۔
ویڈیو میں آکٹوپس کو غصے میں دیکھا جا سکتا ہے۔
