گوجرانوالہ میں ایک خاتون کی جانب سے اپنے سابق شوہر کا گھر جلانے کا واقعہ پیش آیا ہے، ملزمہ کو اس کی دوسری شادی کا رنج تھا۔
اس حوالے سے پولیس حکام کا کہنا ہے کہ خاتون نے اپنے سابق شوہر کے گھر کو آگ لگادی، جس نے دوسری شادی کی تھی اور آج ولیمہ تھا۔
پولیس کے مطابق واقعہ محلہ اسلام آباد میں پیش آیا، صالحہ نامی خاتون نے مبینہ طور پر ولیمے کے دن گھر میں گھس کر آگ لگائی، بعد ازاں آگ پر قابو پالیا گیا۔
آگ نے دو کمروں اور صحن میں رکھے سامان کو جلادیا، دولہا اور اس کے والدین ولیمے کی تقریب میں تھے، سابق شوہر عدنان نے تین سال قبل گھریلو جھگڑے کے بعد خاتون کو طلاق دی تھی۔
عدنان اور صالحہ کی 10 سال قبل شادی ہوئی تھی، عدنان والدین کے گھر سے ملحقہ اپنے دوسرے مکان میں صالحہ کے ساتھ رہتا تھا تین سال قبل میاں بیوی میں طلاق ہوگئی تو عدنان والدین کے گھر شفٹ ہوگیا۔
