ممبئی: پاکستان میں پیش آنے والے اندوہناک طیارے حادثے پر ہر شخص کا دل غمزدہ ہے، بالی ووڈ کے دو معروف اداکاروں نے بھی واقعے پر افسوس کا اظہار کیا ہے۔
ایک روز قبل پیش آنے والے افسوسناک واقعے پر بھارت کے لیجنڈری اداکار شترو گھن سنہا نے افسوس کا اظہار کرتے ہوئے تعزیتی پیغام جاری کیا۔ اُن کا کہنا تھا کہ ’طیارہ حادثے کی خبر سُن کر میں افسردہ ہوگیا، میری دلی ہمدردیاں اُن تمام متاثرہ خاندانوں کے ساتھ ہیں جن کے پیارے اس حادثے میں کھو چکے ہیں‘۔
Shocked to hear about the plane crash, in a residential colony near #Karachi airport. My heartfelt condolences & prayers to the bereaved families & speedy recovery & healing prayers for those injured. This not a matter of nationality, but humanity.#PIAPlaneCrash
— Shatrughan Sinha (@ShatruganSinha) May 23, 2020
انہوں نے لکھا کہ ’میں دعا گو ہوں کہ جو لوگ اس واقعے میں زخمی ہوئے اور جنہیں ریکسیو کیا گیا اللہ انہیں جلد صحت یاب کرے اور وہ دوبارہ صحت مند زندگی کی طرف لوٹ آئیں‘۔
بالی ووڈ اداکار انیل کپور نے سماجی رابطے کی ویب سائٹ پر لکھا کہ آبادی والے علاقے میں گر کر تباہ ہونے والی طیارے کی خبر میرے لیے ناقابل یقین ہے، میری تمام تر ہمدردیاں اور دعائیں متاثرہ خاندانوں کے ساتھ ہیں۔
Deeply saddened to hear about the #planecrash in #Karachi. My heartfelt condolences to all the families who have lost loved ones and sending my prayers for the speedy rescue & recovery of the ones who are injured. 🙏🏻
— Anil Kapoor (@AnilKapoor) May 22, 2020
انہوں نے حادثے میں زخمی ہونے والے افراد کی جلد صحت یابی کے لیے دعا کی اور لکھا کہ ’یہ قومیت کا نہیں بلکہ انسانیت کا مسئلہ ہے‘۔
مزید پڑھیں: طیارہ حادثے میں جاں بحق پاکستانی ماڈل سے ارطغرل کی حلیمہ نے معذرت کرلی
یاد رہے کہ لاہور سے کراچی آنے والی پرواز پی کے 8303 میں 90 مسافر اور 8 کریئو ممبران شامل تھے، پائلٹ نے طیارے کی باحفاظت لینڈنگ کے لیے ہر ممکن کوشش کی مگر بدقسمت طیارہ کراچی ایئرپورٹ کے قریب واقع ماڈل کالونی کے آبادی والے علاقے میں گر کر تباہ ہوا۔
سی سی ٹی وی فوٹیج میں دیکھا جاسکتا ہے کہ طیارہ کے انجن سے دھواں اٹھ رہا تھا اور وہ مکان کی چھت سے ٹکرایا تھا ۔ حادثے میں دو مسافر معجزانہ طور پر محفوظ رہے جبکہ بقیہ 96 مسافر جاں بحق ہوگئے ہیں جبکہ واقعے میں علاقہ مکینوں کی اموات بھی ہوئیں اور پانچ گھر مکمل تباہ جبکہ متعدد متاثر بھی ہوئے ہیں۔
