The news is by your side.

نوجوان خاتون کا قتل: نامناسب بیان پر آر ایس ایس کارکن کے خلاف مقدمہ

نئی دہلی: بھارتی ریاست اتراکھنڈ کے ریزورٹ میں پراسرار حالات میں قتل ہونے والی مقتول انکیتا کے خلاف نامناسب فیس بک پوسٹ پر آر ایس ایس کے کارکن کے خلاف مقدمہ درج کرلیا گیا۔

بھارتی میڈیا کے مطابق انکیتا بھنڈاری کے قتل کیس میں اتراکھنڈ پولیس نے جمعرات کے روز راشٹریہ سویم سیوک سنگھ (آر ایس ایس) کے کارکن وپن کرنوال کے خلاف مقدمہ درج کیا ہے۔

وپن کرنوال پر الزام ہے کہ انہوں نے انکیتا بھنڈاری پر قابل اعتراض تبصرہ کیا تھا اور ان کے والد کو ان کی موت کا ذمہ دار ٹھہرایا تھا۔

کرنوال کی فیس بک پوسٹ پر عوام میں غم و غصہ پایا جارہا ہے جس پر لوگوں نے احتجاج کرتے ہوئے کرنوال کی گرفتاری کا مطالبہ بھی کیا۔

خواتین کمیشن کی چیئر پرسن کسم کنڈوال نے بھی کرنوال کو تنقید کا نشانہ بنایا جس کے بعد کرنوال نے زبانی اور تحریری طور پر معافی مانگی۔

ان کی پوسٹ کے بعد رشی کیش اور رائے والا کے علاقے میں ہنگامہ آرائی بھی ہوئی جس کے بعد ان کے خلاف پولیس میں شکایت درج کروائی گئی۔

خیال رہے کہ اتراکھنڈ کے ریزورٹ میں چند روز قبل ایک نوجوان خاتون کا پراسرار حالات میں قتل ہوا تھا۔ خاتون کے آخری میسجز کے اسکرین شاٹس بھی منظر عام پر آئے ہیں جس میں انہوں نے ریزورٹ کے مالک پر سنگین الزامات عائد کیے ہیں۔

Comments

یہ بھی پڑھیں