کراچی: جماعت نہم (سائنس گروپ) کے سالانہ امتحانات برائے سال 2021 کے نتائج کا اعلان کر دیا گیا۔
تفصیلات کے مطابق ثانوی تعلیمی بورڈ کراچی کے چیئرمین سید شرف علی شاہ نے (SSC-Part I) جماعت نہم سائنس گروپ کے سالانہ امتحانات برائے سال 2021 کے نتائج کا اعلان کر دیا
اس موقع پر ناظم امتحانات ظہیرالدین بھٹو اور رزلٹ کمیٹی کے ممبران بھی موجود تھے۔
چیئرمین بورڈ سید شرف علی شاہ نے کہا کہ طلبہ و طالبات یہ نتائج بورڈ کی ویب سائٹ www.bsek.edu.pk پر اور ایس ایم ایس سروس bsek لکھ کر اسپیس دیں اور اپنا رول نمبر لکھ کر 8583 پر بھیج کر نتائج دیکھ سکتے ہیں۔
رواں برس سائنس گروپ میں 157255 طلبہ و طالبات رجسٹرڈ ہوئے جن میں سے 153417 طلبہ و طالبات امتحانات میں شریک ہوئے، امتحانات میں شامل ہونے والوں میں 82143 طلبہ اور 71274 طالبات شامل تھیں، جب کہ غیر حاضر طلبہ و طالبات کی تعداد 3838 رہی۔
تمام پرچوں میں کامیاب طلبہ و طالبات کی تعداد 145949 رہی اور کامیابی کا تناسب 95.13 فی صد رہا۔
اسی طرح ایک پرچے میں 917، دو پرچوں میں 86، تین پرچوں میں 347 طلبہ و طالبات ناکام ہوئے، جب کہ تمام پرچوں میں 6118 طلبہ و طالبات فیل قرار پائے۔
