کراچی : پاکستان میں ایک اور برطانوی تعلیمی بورڈ کا باقاعدہ آغاز کردیا گیا، برطانوی ڈپٹی ہائی کمشنر نے کہا کہ برطانوی نظام تعلیم دنیا میں بہترین ہے، اسے 150 ممالک نے اپنایا ہے۔
تفصیلات کے مطابق ایک اور برطانوی تعلیمی بورڈ لرننگ ریسورس نیٹ ورک (LRN) کا پاکستان میں باقاعدہ آغاز کر دیا گیا ہے۔
افتتاحی تقریب میں برطانوی ڈپٹی ہائی کمشنر مارٹن ڈاوسن ،برطانوی ماہر تعلیم اور لرننگ ریسورس سینٹرکے سربراہ طارق زوہیب،برطانوی اسکول کے سربراہ روسیل کولینز،ثمرہ پیران اور دیگر نے شرکت کی۔
برطانوی ڈپٹی ہائی کمشنر مارٹن ڈاوسن نے کہا کہ تعلیم معاشرے کی تشکیل میں اہم کردار ادا کرتی ہے، شراکت دار کی حیثیت سے پاکستان برطانیہ کیلئے اہم ہے۔
لرننگ ریسورس کے سربراہ طارق زوہیب کا کہنا تھا کہ ہمارا ادارہ ایک تسلیم شدہ ایوارڈ دینے والی تنظیم ہے۔
لرننگ ریسورس کے اسسمنٹ منیجر انجیلا کاڈی پائیوا نے کہا کہ پاکستان میں ٹیلنٹ کی کوئی کمی نہیں، پاکستانی بچے ذہین ترین بچوں میں شامل ہیں، ہم پاکستان میں جی سی ،ایس ای اے ایس اور اے لیول اور دیگر پروگرامات لیکر آرہے ہیں۔
اس موقع پر ڈاکٹر خدیجہ مشتاق کو تعلیمی خدمات پر لائف ٹائم اچیومنٹ ایوارڈ دیا گیا، جو ان کی بیٹی نیہا مشتاق نے وصول کیا۔
مارٹن ڈاوسن نے کہا کہ تعلیم معاشرے کی تبدیلی اور معاشی ترقی میں اہم کردار ادا کرتی ہے اور یہی وجہ ہے کہ برطانیہ اسے بہت اہمیت دیتا ہے۔
ان کا کہنا تھا کہ برطانوی نظام تعلیم دنیا میں بہترین ہے، اور اسے 150 ممالک نے اپنایا ہے۔
تقریب میں لرننگ ریسورس کے حوالے سے مباحثہ میں ماہر تعلیم نے حصہ لیا اور تعلیم کے شعبے میں خدمات انجام دینے والی شخصیات میں شیلڈ بھی تقسیم کی گئی جبکہ برطانوی ڈپٹی ہائی کمشنر نے اس موقع پر کیک بھی کاٹا۔
