بیجنگ: چین نے خلائی اسٹیشن کی تعمیر کیلئے خلا بازوں کا ناموں کا اعلان کردیا ہے۔
غیر ملکی میڈیا رپورٹ کے مطابق چائنہ انسان بردار خلائی ایجنسی(سی ایم ایس اے) کے ڈائریکٹر اسسٹنٹ جی چھی مِنگ نے ایک پریس کانفرنس میں کہا کہ چین کے خلائی اسٹیشن کی تعمیر کے دوران پہلا انسان بردار مشن روانہ ہوگا جو مدار میں تین ماہ کیلئے قیام کرے گا۔
چینی خلاباز نے ہائی شینگ اس مشن کی قیادت کرینگے جبکہ لیو بومِنگ اور ٹانگ ہونگ بوشین ژو-12 کے اس مشن میں شامل ہونگے، ان تینوں خلابازوں میں ہائی شینگ سب سے زیادہ تجربہ کار ہیں جوکہ دو ہزار پانچ میں شین ژو-6 اور دوہزار تیرہ میں شین ژو-10مشن کا حصہ تھے۔
میڈیا رپورٹ کے مطابق لیو بومِنگ کی کی خلا میں یہ دوسری پروازہوگی، اس سے قبل انہوں نے دوہزار آٹھ میں شین ژو-7مشن میں حصہ لیاتھا جس کی خصوصیت خلا میں نمایاں چہل قدمی تھی۔
ٹانگ ہونگ پہلی مر تبہ خلا میں جا ئیں گے،وہ دو ہزار دس میں چینی خلا بازوں کے دوسرے دستے کے رکن بنے تھے۔
میڈیا رپورٹ کے مطابق ژائی ژی گانگ،وانگ یاپھِنگ اور یے گوانگ فو متبادل عملہ ہوں گے۔
یاد رہے کہ رواں سال اپریل میں چین نے خلا میں اپنے ایک علیحدہ اسٹیشن کی تعمیر کے لیے تاریخی قدم اٹھاتے ہوئے اپنا اولین ماڈیول خلا کی طرف روانہ کیا تھا۔
واضح رہے کہ خلا میں اس وقت ‘انٹرنیشنل اسپیس اسٹیشن’ قائم ہے جس میں چین کا کوئی حصہ نہیں ہے، یہ اسٹیشن امریکا، جاپان، کینیڈا، روس، اور یورپ کی خلائی ایجنسیوں نے مل کر تیار کیا ہے۔ ممکنہ طور پر چین کا نیا خلائی اسٹیشن خلا میں انٹرنیشنل اسٹیشن کی اجارہ داری ختم کرسکتا ہے۔
