راولپنڈی: 8 سالہ گھریلو ملازمہ پر تشدد کرنے والے میاں بیوی کو گرفتار کرلیا گیا، گرفتار ملزمان میں علی شیر اور بیوی بختاورشامل ہیں۔
اے آر وائی نیوز کے مطابق گھر میں کام کرنے والی بچی کو تشدد کا نشانہ بنانے کا ایک اور کیس سامنے آیا ہے، پولیس نے فوری کارروائی کرتے ہوئے گھریلو ملازمہ 8 سالہ بچی پر تشدد کرنے والے جوڑے کو حراست میں لے لیا ہے۔
سی پی او نے اپنے بیان میں کہا کہ جن ملزمان کی گرفتاری عمل میں آئی ہے ان کے نام علی شیر اور بختاور ہیں جو کہ میاں بیوی ہیں۔
انھوں نے کہا کہ بچی بختاور اور علی شیر کے گھر میں کام کرتی تھی جس کو تشدد کا نشانہ بنایا گیا تھا، واقعے کا مقدمہ متاثرہ بچی کے والد کی مدعیت میں تھانہ روات میں درج تھا۔
سی پی او نے واقعے کا نوٹس لیتے ہوئے ملزمان کو فوری گرفتار کرنے کا حکم دیا تھا، جس کے بعد چھوٹی بچی کو مار پیٹ کا نشانہ بنانے والے قانون کی گرفت میں آئے۔
سی پی او خالد ہمدانی کا کہنا تھا کہ میرٹ پر تفتیش کر کے ملزمان کوعدالت میں پیش کیا جائے گا، بچوں پر تشدد، زیادتی اور استحصال برداشت نہیں کیا جائے گا۔
