پاکستان کرکٹ بورڈ نے جنوبی افریقہ کیخلاف ٹیسٹ سیریز سے قبل ریڈ بال ٹیم کے کوچ جیسن گلیسپی کے نائب ٹم نیلسن کو فارغ کر دیا ہے۔
پاکستان کرکٹ بورڈ نے ٹیسٹ ٹیم کے کوچ جیسن گلیسپی کے نائب ٹم نیلسن کو فارغ کر دیا ہے۔ یہ فیصلہ ایسے وقت سامنے آیا ہے جب پاکستان نے چند روز بعد جنوبی افریقہ کے خلاف دو ٹیسٹ میچوں کی سیریز کھیلنی ہے۔
ٹم نیلسن نے غیر ملکی ویب سائٹ سے بات چیت کرتے ہوئے اس بات کی تصدیق کی اور کہا کہ ٹیم کے ساتھ اچھا کام چل رہا تھا لیکن پی سی بی نے میرے معاہدے کی تجدید نہیں کی۔ مجھے بتایا گیا کہ اب میری ضرورت نہیں ہے۔
ذرائع کا کہنا ہے کہ ٹم نیلسن کے فارغ ہونے سے جیسن گلیسپی کا مستقبل بھی خطرے میں پڑ گیا ہے۔
جیسن گلیسپی جو اس وقت آسٹریلیا میں ہیں وہ آئندہ ہفتے پاکستان ٹیم کو جنوبی افریقہ میں جوائن کریں گے۔
واضح رہے کہ پاکستان اور جنوبی افریقہ کے درمیان دو ٹیسٹ میچوں کی سیریز کھیلی جانی ہے۔ پہلے ٹیسٹ میچ کا آغاز 26 دسمبر سے سنچورین میں ہوگا۔
واضح رہے کہ دو ماہ قبل دورہ آسٹریلیا سے قبل وائٹ بال ٹیم کوچ گیری کرسٹن نے استعفیٰ دے دیا تھا اور پی سی بی نے یہ استعفیٰ منظور کرتے ہوئے جیسن گلیسپی کو دورہ آسٹریلیا کے لیے وائٹ بال ٹیم کا بھی عبوری ہیڈ کوچ مقرر کیا تھا۔ بعد ازاں عاقب جاوید کو چیمپئنز ٹرافی تک یہ ذمہ داری سونپی گئی۔
