پاکستان کرکٹ ٹیم کے کپتان بابر اعظم آج نیوزی لینڈ کے خلاف چوتھے ون ڈے میں ایک اور عالمی اعزاز اپنے نام کر سکتے ہیں۔
پاکستان اور نیوزی لینڈ کے درمیان پانچ ون ڈے میچوں پر مشتمل سیریز کا چوتھا میچ آج کراچی کے نیشنل اسٹیڈیم میں کھیلا جا رہا ہے۔ نیوزی لینڈ نے ٹاس جیت کر پاکستان کو پہلے بیٹنگ کی دعوت دی ہے۔ قومی کپتان بابر اعظم آج ایک اور اہم سنگ میل عبور کرنے کے قریب ہیں۔
بابر اعظم آج ون ڈے میں تیز ترین 5 ہزار رنز بنانے والے بیٹر کا اعزاز پا سکتے ہیں۔ اس کے لیے انہیں صرف 19 رنز درکار ہیں۔
قومی کپتان نے اب تک 98 میچز کی 96 ویں اننگ میں 4981 رنز بنا رکھے ہیں۔
اس وقت سابق جنوبی افریقی بیٹر ہاشم آملہ کے پاس ون ڈے میں تیز ترین پانچ ہزار رنز بنانے کا ریکارڈ ہے۔ انہوں نے یہ ریکارڈ اپنی 101 ویں ون ڈے اننگ میں بنایا تھا۔
ہاشم آملہ نے ویسٹ انڈیز کے خلاف 2015 میں دنیا کے تیز ترین پانچ ہزار رنز بنانے والے بلے باز کا اعزاز حاصل کرکے سابق ویسٹ انڈین کپتان ویوین رچرڈ کا 28 سالہ ریکارڈ توڑا تھا۔
واضح رہے کہ رواں سیریز میں ہی بابر اعظم نے ایک اور اہم سنگ میل عبور کیا اور انٹرنیشنل کرکٹ میں 12 ہزار رنز مکمل کیے ہیں۔
وہ اس وقت آئی سی سی کی ون ڈے پلیئر رینکنگ میں بھی ٹاپ پوزیشن پر موجود ہیں۔
