امریکی صدر جو بائیڈن کے چیف میڈیکل ایڈوائزر انتھونی فاؤچی کا کہنا ہے کہ کرونا وائرس پر قابو پانے کا واحد حل ویکسی نیشن ہی ہے، لوگوں کو وبا کے مکمل طور پر خاتمے کے لیے جلد سے جلد ویکسی نیشن کروا لینی چاہیئے۔
تفصیلات کے مطابق امریکی صدر جو بائیڈن کے چیف میڈیکل ایڈوائزر انتھونی فاؤچی نے اپنے حالیہ انٹرویو میں کہا ہے کہ کرونا وائرس پر قابو پانے کا واحد طویل المیعاد حل ویکسی نیشن ہی ہے جو بھارت میں بھی کرونا پر قابو پانے میں مددگارثابت ہوسکتا ہے۔
ڈاکٹر فاؤچی نے کرونا وبا سے نمٹنے کے لیے اینٹی کووڈ ویکسین کی پیداوار بڑھانے پر زور دیا۔
اپنے انٹرویو میں ان کا کہنا تھا کہ لوگوں کو وبا کے مکمل طور پر خاتمے کے لیے اور کرونا وائرس سے بچاؤ کے لیے جلد سے جلد ویکسی نیشن کروا لینی چاہیئے۔
ڈاکٹر فاؤچی کا کہنا تھا کہ بھارت دنیا کا سب سے بڑا ویکسین تیار کرنے والا ملک ہے۔ اسے نہ صرف ملک کے اندر سے، بلکہ باہر سے بھی وسائل و ذرائع حاصل ہیں، اسی لیے دوسرے ممالک کو یا تو ویکسین تیار کرنے میں بھارت کی مدد کرنی چاہیئے یا ویکسین کا عطیہ کرنا چاہیئے۔
ایک سوال کے جواب میں ڈاکٹر فاؤچی نے کہا کہ بھارت کو فوری طور پر عارضی اسپتال بنانے کی ضرورت ہے، جس طرح چین نے ایک سال قبل کیا تھا۔
انہوں نے کہا کہ مریضوں کے لیے اسپتال میں بستر نہیں ہیں تو آپ لوگوں کو گلیوں میں نہیں چھوڑ سکتے۔ آکسیجن نہ ہونے کے سبب وہاں کے حالات بدترین ہیں۔
ڈاکٹر فاؤچی نے مزید کہا کہ اسپتالوں میں بستر، آکسیجن، پی پی ای کٹس اور دیگر طبی سامان فوری طور پر مہیا کرنا ضروری ہے۔ انہوں نے وائرس کے پھیلاؤ کو روکنے کے لیے ملک گیر لاک ڈاؤن کی ضرورت پر بھی زور دیا۔
