The news is by your side.

Advertisement

سعودی عرب: انسداد گداگری کی مہم تیز، بھاری جرمانے عائد

ریاض: سعودی عرب میں وزارت داخلہ کی ہدایت پر گداگری کے انسداد کی مہم تیز کردی گئی، گداگری کا پیشہ اپنانے یا گداگر کی مدد کرنے پر بھاری جرمانے عائد ہیں۔

سعودی ویب سائٹ کے مطابق سعودی محکمہ امن عامہ کے اہلکار مملکت کے مختلف علاقوں میں گداگروں کو پکڑنے کی مہم جاری رکھے ہوئے ہیں، وزارت داخلہ کی ہدایت پر گداگری کے انسداد کی مہم تیز کردی گئی ہے۔

محکمہ امن عامہ نے مقامی شہریوں اور مقیم غیر ملکیوں سے کہا ہے کہ اگر مکہ مکرمہ اور ریاض ریجنوں میں انہیں کہیں گداگر نظر آئیں تو رابطہ کر کے مطلع کریں۔

محکمہ امن عامہ کا کہنا تھا کہ عطیات کے سرکاری پلیٹ فارم مملکت میں موجود ہیں، ضرورت مندوں تک عطیات کی ترسیل کو یقینی بنانے کے لیے سرکاری عطیات پلیٹ فارم سے رجوع کیا جائے۔

یاد رہے کہ گداگری کا پیشہ اپنانے، گداگری پر آمادہ کرنے یا گداگر کی مدد کرنے پر 6 ماہ تک قید یا 50 ہزار ریال تک جرمانے کی سزا ہے۔ دونوں میں سے کوئی ایک سزا بھی دی جاسکتی ہے۔

گداگری کا پیشہ اپنانے یا گداگروں سے بھیک منگوانے پر ایک سال کی قید یا ایک لاکھ ریال تک جرمانے کی سزا ہوسکتی ہے۔

اگر کوئی غیر ملکی گداگری میں ملوث پایا جائے گا تو اسے قید کی سزا مکمل کرنے کے بعد مملکت سے بے دخل اور بلیک لسٹ کردیا جائے گا۔

Comments

یہ بھی پڑھیں