کراچی : کے ایم سی نے ماڑی پور ٹرک اسٹینڈ پر چار دن بعد تجاوزات کے خلاف آپریشن کا فیصلہ کرلیا، میئر کراچی کا کہنا ہے کہ کے الیکٹرک کو بجلی کے غیرقانونی کنکشنز فوری منقطع کرنے کا کہہ دیا ہے۔
تفصیلات کے مطابق سپریم کورٹ کے واضح احکامات پر کراچی میں تجاوزات کیخلاف آپریشن کا سلسلہ جاری ہے، اس سلسلے میں کےایم سی نے ماڑی پور ٹرک اسٹینڈ پرتجاوزات کےخلاف 4 دن بعد آپریشن کا فیصلہ کرلیا گیا ہے۔
کے ایم سی کے محکمہ انسداد تجاوزات سیل کا کہنا ہے کہ ٹرک اسٹینڈ سے غیرقانونی دکانوں اور تجاوزات کو صاف کردیا جائے گا، مذکورہ آپریشن ٹرک اسٹینڈ اسیوسی ایشن کے عہدیدارن کو اعتماد میں لے کر کیا جائے گا۔
اس حوالے سے ذرائع کا کہنا ہے کہ ماڑی پورٹرک اسٹینڈ کے قریب سے گزرنے والے نالے پر غیر قانونی دکانیں قائم ہیں، نالے پرٹرک مافیا نے ورکشاپ اور مکینک کی دکانیں تعمیر کردی تھیں، تجاوزات کے باعث نالہ مکمل طور پر بند ہوگیا۔
نالے پر1500سے زائد دکانیں غیر قانونی طور پر تعمیر کی گئیں، ٹرک اسٹینڈ کا گیٹ نمبر1،2،4،5مکمل تجاوزات سے بھردیا گیا۔
ذرائع کے مطابق مئیر کراچی وسیم اختر نے کے الیکٹرک حکام سے رابطہ کیا ہے۔
انہوں نے کہا کہ ماڑی پور ٹرک اسٹینڈ پر تجاوزات کیخلاف آپریشن ہونے جارہا ہے لہٰذا بجلی کے غیرقانونی کنکشنز فوری طور پر منقطع کیےجائیں۔
