پشاور : فاٹا میں انسداد پولیو کی تین روزہ مہم کا آغاز مورخہ سولہ جنوری بروز پیر سے ہوگا، مذکورہ پولیو مہم پاک فوج کی نگرانی میں کی جائیگی، مہم میں فاٹا کے پانچ سال سے کم عمر کے 1029179 بچوں کو پولیو کے قطرے پلوا ئے جائیں گے۔
تفصیلات کے مطابق فاٹا میں بروز پیر سے سال 2017 کی پہلی انسداد پولیو مہم شروع ہو جائے گی، پولیٹیکل ایجنٹس ، کمشنرز ، نیم فوجی اور فوجی دستوں کی سرپرستی اور فراہم کی گئی سیکورٹی میں تین روزہ انسداد پولیو مہم 16جنوری 2017 سے 18 جنوری 2017 تک جاری رہے گی۔
مہم کے بعد رہ جانے والے بچوں کو پولیو کے قطرے پلوانے اور سرویلنس کا کام جاری رکھا جائے گاـ مہم میں فاٹا کے پانچ سال سے کم عمر کے 1029179 بچوں کو پولیو کے قطرے پلوا ئے جائیں گے۔
گورنرخیبر پختونخواہ انجنیر اقبال ظفر جھگڑا نے گونر ہاؤس میں منعقد ہونے والے فاٹا کی پولیو ٹاسک فورس کے اجلاس میں کہا کہ فاٹا میں پولیو کے خاتمہ تقریبأ ہو چکا ہے اورآئندہ چلائی جانے والی انسداد پولیو مہمات کے معیار میں بہتری اور فاٹا میں ہر بچہ تک رسائی کے ذریعے پولیو کے مکمل خاتمے کو حقیقت میں تبدل کیا جا سکتا ہے۔
واضح رہے کہ پاکستان میں 2016 کے دوران پولیو کیسزکی کل تعداد 20 رہی جو تیرہ اضلاع سے سامنے آئے،جبکہ2015 میں 23 اضلاع سے 54 کیسزسامنے آئے۔
