ٹوکیو: جاپان میں کرونا مریضوں کے اینٹی باڈی کاکٹیل سے علاج میں پیش رفت ہو ئی ہے۔
تفصیلات کے مطابق جاپان کی وزارت صحت کووِڈ 19 کے ایسے مریضوں کی تعداد میں اضافہ کرنے جا رہی ہے، جن کا علاج حال ہی میں منظور شدہ 2 ادویات ایک ہی وقت میں استعمال کر کے کیا جا رہا ہے۔
وزارت کے مطابق یہ مرکب مختصر مدت کے لیے اسپتال میں داخل رہنے کے دوران دیا جائے گا، اینٹی باڈی کاکٹیل ٹریٹمنٹ کہلانے والے اس علاج میں مریضوں کو ڈِرپ کے ذریعے نس میں دو ادویات دی جاتی ہیں تاکہ وائرس کی سرگرمی کو دبایا جا سکے۔
واضح رہے کہ اس کاکٹیل کے اثر کو جاننے کے لیے بیرونِ ملک انجام دیے گئے ایک طبی تجربے میں تصدیق ہوئی تھی کہ اس تھراپی سے اسپتال میں داخل ہونے کی شرح یا موت کا خطرہ 70 فی صد تک کم ہو جاتا ہے۔
جاپان: کرونا مریضوں کے لیے اینٹی باڈی کاکٹیل
وزارت صحت جاپان کا کہنا ہے کہ فی الوقت مذکورہ ادویات کی دستیابی محدود ہے، اس لیے یہ طریقہ معمر مریضوں اور صحت کے شدید مسائل میں مبتلا لوگوں کے لیے استعمال کیا جا رہا ہے، اور ان کے لیے جو اسپتال میں داخل ہیں۔
لیکن ملک میں کرونا کیسز اور گھروں میں قرنطینہ ہونے والے افراد میں اضافے کے سبب اب اس کے استعمال کا دائرہ پھیلانے پر بھی زور دیا جانے لگا ہے۔
اسپتالوں میں مختصر مدت کے لیے داخل ہونے والے مریضوں کا علاج اس اینٹی باڈی کاکٹیل سے کرنے کے لیے وزارت صحت مقامی حکومتوں کے ساتھ مل کر انتظامات کرے گی۔
