اسلام آباد : وزیراعظم شہباز شریف کے دورہ ترکیہ کے باعث 9 فروری کو ہونے والی اے پی سی مؤخر کردی گئی۔
تفصیلات کے مطابق وفاقی وزیر اطلاعات مریم اورنگزیب نے سماجی رابطے کی ویب سائٹ ٹویٹر پر اپنے بیان میں کہا ہے کہ وزیراعظم شہباز شریف کل صبح انقرہ روانہ ہوں گے اور وزیراعظم کے دورہ ترکیہ کی وجہ سے 9 فروری کو اے پی سی مؤخرکی جا رہی ہے، اتحادیوں کی مشاورت سے نئی تاریخ کا اعلان ہوگا۔
مریم اورنگزیب کا کہنا ہے کہ شہباز شریف ترک صدر سے زلزلے میں جانی نقصان پرتعزیت کریں گے اور ترکیہ کے عوام سے یک جہتی کریں گے۔
وزیراعظم شہباز شریف کل صبح انقرہ روانہ ہوں گے، وہ صدر اردوان سے زلزلے کی تباہی، جانی نقصان پر افسوس اور تعزیت،ترکیہ کے عوام سے یک جہتی کریں گے۔ وزیراعظم کے دورہ ترکیہ کی وجہ سے جمعرات 9 فروری کو بلائی گئی اے پی سی مؤخر کی جا رہی ہے، اتحادیوں کی مشاورت سے نئی تاریخ کا اعلان ہوگا
— Marriyum Aurangzeb (@Marriyum_A) February 7, 2023
گذشتہ روز وزیر اطلاعات مریم اورنگزیب نے کہا تھا کہ وزیراعظم کی جانب سے بلائی گئی اے پی سی 7 کے بجائے 9 فروری کو ہو گی ، اے پی سی میں ملک کی تمام قومی و سیاسی قیادت کو مدعو کیا گیا ہے۔
مریم اورنگزیب کا کہنا تھا کہ کانفرنس میں دہشتگردی، اور درپیش چیلنجز کے مقابلے کی حکمت عملی مرتب کی جائے گی اور نیشنل ایکشن پلان پر نظرثانی ہو گی۔
