کراچی: وزیراعلی سندھ کی زیر صدارت ہونے والے اپیکس کمیٹی اجلاس میں اہم فیصلے کئے گئے۔
تفصیلات کے مطابق وزیراعلی سندھ کی زیر صدارت اپیکس کمیٹی کا اجلاس ہوا، اجلاس میں کور کمانڈر کراچی،ڈی جی رینجرز،آئی جی سندھ سمیت دیگر حکام نے شرکت کی،اجلاس میں صوبے کی مجموعی امن وامان اور اسٹریٹ کرائم کی صورتحال پر غور کیا گیا۔
اجلاس میں وزیراعلیٰ سندھ نے سیف سٹی پراجیکٹ کی لاگت کو ریویو کرنے کےلیے کمیٹی قائم کردی، کمیٹی میں پولیس،پاک آرمی اور دیگرماہرین شامل ہوں گے،کمیٹی چھ ہفتوں میں رپورٹ جمع کرائےگی۔
اپیکس کمیٹی میں ہونے والے دیگر اہم فیصلے
کچے کے علاقے میں روڈ نیٹ ورک قائم کرنے کا فیصلہ کیا گیا، اس مقصد کے لئے کشمور برج سے نکلنے والی دیگر روڈز کو بھی بنانے کا فیصلہ کیا گیا۔
کچے کے ڈاکوؤں کو اسلحے کی فراہمی روکنے کے لئے پولیس کو فوری طور پر سپلائی لائن ختم کرنے کا حکم
اجلاس میں فیصلہ کیا گیا کہ سندھ میں جاری قبائلی جھگڑوں کا خاتمہ قبائلی سرداروں کے ذریعے کیا جائے گا۔
اسٹریٹ کرائم کیسز کے ٹرائلز کے لئے الگ جج تقرر کرنے کی منظوری، ساتھ ہی ہر ضلع کے اسٹریٹ کرائم کے کیسز الگ سے سننے کا فیصلہ۔
ڈی جی سول ایوی ایشن اتھارٹی سے مائی بختاور ائیرپورٹ تھر پر انٹر نیشنل فلائٹس آپریشن شروع سے متعلق مشاورت کرنے کا فیصلہ
وزیراعلی سندھ کی زیر صدارت اپیکس کمیٹی نے افغانستان میں کشیدگی کے باعث صوبے میں سیکیورٹی کے سخت اقدامات کا فیصلہ کیا، وزیراعلیٰ نے متعلقہ اداروں کو کالعدم تنظیموں اور نفرت انگیز مواد پھیلانے والوں پر کڑی نظر رکھنے کی ہدایت کی۔
اس کے علاوہ اجلاس میں آئی جی سندھ نے کراچی میں گیارہ مختلف جگہوں پر احتجاج ، ریلیوں پر پابندی لگانے کی تجویز دی، ان جگہوں میں ہائی وے سے شہر کو آنے والے راستے، ریلوے ٹریکس ، انٹر سٹی بس ٹرمینل ،اہم شاہراہیں شامل ہیں۔
