اسلام آباد : وزیراعظم شہباز شریف کی زیر صدارت نیشنل ایکشن پلان کے تحت اپیکس کمیٹی کا اجلاس آج ہوگا، جس میں اہم فیصلوں کی بھی منظوری دی جائے گی۔
تفصیلات کے مطابق نیشنل ایکشن پلان کے تحت اپیکس کمیٹی کا گزشتہ روزملتوی ہونے والا اجلاس آج وزیراعظم ہاؤس میں ہوگا، وزیراعظم شہباز شریف صدارت کریں گے۔
اجلاس میں اعلیٰ عسکری و سول قیادت اور متعلقہ وفاقی وزرا شرکت کریں گے، تمام وزرائے اعلیٰ، انٹیلی جنس اداروں کے سربراہان بھی شریک ہوں گے۔
امن وامان کی مجموعی صورتحال کا تفصیلی جائزہ لیا جائے گا، انسداد دہشت گردی کے قومی ایکشن پلان پر عملدرآمد کی صورتحال زیر غور آئے گی۔
صوبوں اور وفاق کے درمیان کوآرڈی نیشن بہتر بنانے اورانٹیلی جنس معلومات کی مؤثر شیئرنگ پر غور ہوگا۔
خیبر پختونخوا اور بلوچستان میں دہشت گردی کے بڑھتے واقعات کی وجوہات کا جائزہ لیا جائے گا اور شرکا کو انٹیلی جنس بیسڈ آپریشنز کے نتائج سے بھی آگاہ کیا جائے گا۔
اجلاس میں داخلی سلامتی کو یقینی بنانے کیلئے اہم فیصلوں کی بھی منظوری دی جائے گی۔
