صادق آباد: ضلع رحیم یار خان کے علاقے صادق آباد میں ایک نجی اسپتال نے بے رحمی کی انتہا کر دی، ایک ہی خاندان کے 25 سے بچوں کے اپینڈکس آپریشن کر ڈالے۔
تفصیلات کے مطابق صادق آباد میں 25 سے زائد افراد کے اپینڈکس کی ابتدائی انکوائری رپورٹ سامنے آ گئی ہے، جس میں کہا گیا ہے کہ علاقے میں ایسا کوئی وبائی مرض نہیں ہے جس کی وجہ سے اپینڈکس آپریشن کیے جا سکیں۔
رپورٹ کے مطابق علاقے کے 28 افراد کا اپینڈکس کا آپریشن کیا گیا ہے، جن میں سے 22 مریضوں کا توحید میڈیکل کمپلیکس میں آپریشن کیا گیا، مزید افراد کے آپریشن بھی ہونے تھے تاہم جب 4 مریضوں کا سرکاری اسپتال میں چیک اپ کیا گیا تو ان میں سے کوئی بھی اپینڈکس کے مرض میں مبتلا نہیں تھا۔
پاکستان میں 97 فی صد فارمیسیز میں ادویات درست طریقے سے اسٹور نہیں کی جاتیں: تحقیق
انکوائری کمیٹی نے مقامی اسپتال کا دورہ کیا، اور پایا گیا کہ وہاں سرجری کے انتظامات موجود نہیں تھے، توحید میڈیکل کمپلیکس کے پاس پنجاب ہیلتھ کیئر کمیشن کا لائسنس بھی نہیں تھا۔
رپورٹ کے مطابق 5 ڈاکٹروں کے نام بورڈ پر تھے صرف 4 نے سرجری کی، ڈاکٹر طارق محمود کا کسی بھی اسپتال کے بورڈ پر نام نہیں لیکن پھر بھی سرجری کی، مقامی اسپتال میں لیبارٹری اور بلڈ بینک کا مناسب انتظام بھی نہیں تھا۔
انکوائری کمیٹی کے تمام ممبران نے مریضوں کا معائنہ کیا، کمیٹی نے سرجری کو غیر اخلاقی اور غیر مناسب قرار دے دیا، انکوائری کمیٹی نے توحید میڈیکل کمپلیکس کو بھی سیل کر دیا ہے۔
