آئی فون بنانے والی مشہور زمانہ کمپنی نے وارننگ جاری کرتے ہوئے صارفین کو ہدایت کی ہے کہ سونے کے دوران اپنے فون کو چارج پر لگا کر نہ چھوڑیں۔
ہم میں سے اکثر لوگوں نے کبھی نہ کبھی ایسا لازمی کیا ہوگا کہ سوتے ہوئے موبائل کو چارج پرلگا دیا، اکثر ایسا اپنی سہولت کے پیش نظر کیا جاتا ہے، کمپنی نے خدشہ ظاہر کیا ہے کہ اگر چارجنگ کے دوران موبائی کو وینٹیلیشن (ہوا آنے جانے کے لیے جگہ) نہ ملے تو یہ اوور ہیٹ اور خراب بھی ہوسکتا ہے۔
واررننگ کے مطابق اگر کسی نے سوتے ہوئے موبائل کو چارج پر لگایا اور فون تکیے یا کمبل کے نیچے آنے کے باعث اس کے لیے ہوا رک گئی تو برے نتائج کا سامنا کرنا پڑ سکتا ہے، یعنی اوور ہیٹ ہو کر موبائل میں آگ بھی لگ سکتی ہے۔
ایپل کی جانب سے سامنے آنے والے بیان کے مطابق ’’ کسی ڈیوائس، پاور ایڈاپٹر یا وائرلیس چارجر کے اوپر نہ سوئیں اور انھیں تکیے، کمبل یا اپنے جسم سے ہرگز نہ ڈھکیں جب انھیں بجلی کے ذریعے چارج کیا جارہا ہو۔‘‘
بیان میں مزید کہا گیا کہ اپنے آئی فون، پاور ایڈاپٹر اور وائرلیس چارجر کو جب چارج کریں تو انھیں ہوادار جگہ پر رکھیں، اگر آپ کا جسم آپ کو جلد گرمی کا احساس نہیں دلاتا تو آپ کو خصوصی طور پر خیال رکھنے کی ضورت ہے۔
