دنیا بھر میں 10 عدد مختلف اسمارٹ فونز میں سے اپریل کے مہینے میں جو سب سے زیادہ فروخت ہوا، اس کے بارے میں آپ کو جان کر حیرت نہیں ہوگی کہ یہ ہے ایپل کا آئی فون 13۔
کاؤنٹر پوائنٹ ریسرچ کی تازہ ترین رپورٹ کے مطابق ایپل کے آئی فون 13 نے اپریل 2022 میں سب سے زیادہ فروخت ہونے والے اسمارٹ فونز کی عالمی رینکنگ میں سب کو پیچھے چھوڑ دیا ہے۔
ایپل کے آئی فون 13، آئی فون 13 پرو میکس، آئی فون 13 پرو، اور آئی فون 12 نے اپریل 2022 میں سب سے زیادہ فروخت ہونے والے 10 اسمارٹ فونز میں سرفہرست چار پوزیشنز حاصل کی ہیں۔ جب کہ ان کے علاوہ سام سنگ اور ریڈمی وہ برانڈز ہیں جنھوں نے اس ٹاپ 10 میں اپنی جگہ بنائی۔
فروخت ہونے والے ٹاپ 10 ماڈلز کا مارکیٹ شیئر کُل اسمارٹ فون مارکیٹ کا 21 فی صد رہا، آئی فون 13 مارکیٹ شیئر کے 5.5 فی صد کے ساتھ عالمی سطح پر سب سے زیادہ فروخت ہونے والا اسمارٹ فون بن کر ابھرا۔
آئی فون 13 پرو میکس، جو اس وقت مارکیٹ میں سب سے مہنگا آئی فون ہینڈ سیٹ ہے، 3.4 فی صد عالمی مارکیٹ شیئر کے ساتھ دوسرے نمبر پر رہا۔ جب کہ آئی فون 13 پرو اور آئی فون 12 نے مارکیٹ کا بالترتیب 1.8 اور 1.6 فی صد حصہ حاصل کیا۔
آئی فون ایس ای 2022 عالمی اسمارٹ فون کی فروخت میں 1.4 فی صد حصص کے ساتھ ساتویں نمبر پر رہا، یعنی ٹاپ 10 کی فہرست میں پانچ ایپل ہینڈ سیٹس نے جگہ بنائی، رپورٹ کے مطابق اس ہینڈ سیٹ نے جاپانی اسمارٹ فون مارکیٹ کے 18 فی صد حصے پر قبضہ جمایا۔
Samsung Galaxy S22 Ultra 5G اور Samsung Galaxy A13 فروخت کے 1.5 فی صد اور 1.4 فی صد حصے کے ساتھ بالترتیب پانچویں اور چھٹی پوزیشن پر آئے۔
سامسنگ گیلکسی A03 کور 1.4 فیصد، A 53 فائیو جی 1.3 فی صد، جب کہ چینی اسمارٹ فون ریڈ می نوٹ 11 LTE بھی 1.3 فی صد کے ساتھ بالترتیب آٹھویں، نویں اور دسویں پوزیشن پر آئے۔
A03 Core سو ڈالر سے بھی کم ہول سیل قیمت میں فروخت ہونے والا اسمارٹ فون تھا، نوٹ 11 LTE نے بھی Xiaomi کی کل فروخت میں 11 فی صد حصہ ڈالا۔
