بڑی امریکی ٹیکنالوجی کمپنی ایپل نے آئی فون کے نئے ماڈلز میں اہم تبدیلی کا اعلان کیا ہے۔
فون چاہے کتنا ہی پر تعیش کیوں نہ ہو، بیٹری اور چارجنگ کا مسئلہ کبھی بھی کہیں پیش آ سکتا ہے، ایپل اب اپنے صارفین کے اس اہم اور دیرینہ مسئلے کو مد نظر رکھتے ہوئے آئی فون کے نئے ماڈل میں USB Type-C چارجنگ پورٹ کی ٹیسٹنگ کر رہی ہے۔
خیال رہے کہ اسمارٹ اور فیچر فون بنانے والی تقریبا ہر کمپنی اپنی ڈیوائسز میں ایک ہی جیسا چارجنگ پورٹ فراہم کرتی ہے، جسے اب تھوڑی جدیدیت کے ساتھ ‘یو ایس بی ٹائپ سی’ کا نام دیا گیا ہے۔
بلوم برگ میں شائع رپورٹ کے مطابق ایپل نے اپنے ہینڈ سیٹ کے ڈیزائن میں اس اہم تبدیلی پر کام شروع کر دیا ہے، تاکہ ٹائپ سی پورٹ کے حامل آئی فون 2023 تک صارفین کو دستیاب ہو سکیں، ممکنہ طور پر ایپل آئی فون 15 سیریز کو ٹائپ سی پورٹ کے ساتھ پیش کیا جائے گا۔
کمپنی ایپل کا کہنا ہے کہ ہم ایسے ایڈاپٹر کی تیاری پر کام کر رہے ہیں جو مستقبل میں آنے والے آئی فونز کو موجودہ لائٹننگ کنیکٹرز کے لیے ڈیزائن کردہ ایسیسریز کے ساتھ کام کرنے کا اہل بنائے گا۔
ایپل نے باقاعدہ طور پر آئی فون کے چارجنگ پورٹ میں تبدیلی اور یو ایس بی ٹائپ سی کنیکٹویٹی کے حامل ایڈاپٹرز کی تیاری پر کام شروع کر دیا ہے، کمپنی کی جانب سے میک بک اور آئی پیڈ کے ماڈلز آئی پیڈ پرو، آئی پیڈ ایئر اور آئی پیڈ منی میں پہلے ہی USB Type-C پورٹ فراہم کی جا رہی ہے۔
واضح رہے کہ یورپی یونین تمام اسمارٹ فون کے لیے ایک یونیورسل چارجر لاگو کرنے پر غور کر رہی ہے، اس بابت یورپی کمیشن کا کہنا ہے کہ تمام ڈیوائسز میں ایک اسٹینڈرڈ چارجر سے برقی فضلے میں کمی آئے گی۔
