وفاقی کابینہ نے ملک بھر میں اسمگلنگ کی روک تھام کے لیے پانچ نئی خصوصی عدالتوں کے قیام کی منظوری دے دی ہے۔
اے آر وائی نیوز کے مطابق ملک میں اسمگلنگ کی روک تھام کے لیے خصوصی عدالتوں کے قیام کی منظوری دے دی گئی ہے۔ ذرائع کا کہنا ہے کہ یہ منظوری وفاقی کابینہ نے دی ہے جس کے مطابق ملک بھر میں 5 نئی خصوصی عدالتیں قائم کی جائیں گی جن میں بلوچستان میں تین جب کہ پنجاب اور سندھ میں ایک ایک عدالت قائم کی جائے گی۔
ذرائع کے مطابق وفاقی کابینہ نے سرکولیشن کے ذریعے وزارت قانون و انصاف کی سمری منظور دی ہے۔ یہ خصوصی عدالتیں کسٹمز ایکٹ 1969 کے تحت قائم کی جائیں گی۔
- Advertisement -
ذرائع نے یہ بھی بتایا کہ انسداد اسمگلنگ، کسٹمز اور ٹیکس سیشن کی یہ پانچ عدالتیں کراچی، کوئٹہ، چمن، نوشکی اور ملتان میں قائم کی جائیں گی۔
