پاکستان ٹیم کے ہیڈ کوچ عاقب جاوید کا کہنا ہے کہ نیوزی لینڈ سے ون ڈے سیریز میں فاسٹ بولرز کا کردار اہم ہوگا۔
پاکستان ٹیم کے ہیڈ کوچ عاقب جاوید نے پہلے ون ڈے میچ سے قبل میڈیا سے گفتگو کرتے ہوئے کہا کہ اسی ون ڈے ٹیم نے آسٹریلیا اور جنوبی افریقا میں سیریز جیتی۔
انہوں نے کہا کہ کیویز کے خلاف اچھا پرفارم کریں گے، ون ڈے کی ٹیم اچھی بنی ہوئی ہے اس میں تبدیلی کی ضرورت نہیں۔
عاقب جاوید نے کہا کہ نیوزی لینڈ میں ٹی ٹوئنٹی سیریز کے لیے کنڈیشنز بہت چیلنجنگ تھیں، مجھے پوری امید ہے ٹی ٹوئنٹی کے یہی پلیئرز برصغیر کی پچز پر بہترین ہوں گے۔
ہیڈ کوچ کا کہنا تھا کہ فخر زمان اور صائم ایوب کے آنے اور پی ایس ایل کے بعد اچھی ٹی 20 ٹیم بن جائے گی۔
واضح رہے کہ پاکستان اور نیوزی لینڈ کے درمیان پہلا ون ڈے کل نیپیئر میں کھیلا جائے گا، پاکستانی وقت کے مطابق میچ رات 3 بجے شروع ہوگا۔
خراب موسم اور بارش کے باعث قومی ون ڈے اسکواڈ کی آپشنل انڈور پریکٹس ہوئی۔ بیٹرز نے نیٹس میں تھرو ڈاؤن پر بیٹنگ مشقیں کیں۔
پاکستان اور نیوزی لینڈ کے درمیان ون ڈے سیریز ٹرافی کی رونمائی بھی ہوئی۔ قومی ٹیم کے کپتان محمد رضوان اور کیوی کپتان نے ٹرافی کے ساتھ تصاویر بنوائیں۔
