آئی سی سی ورلڈکپ 2023 کے میچ میں افغانستان کے ہاتھوں پاکستان کو 8 وکٹوں سے شکست کے بعد سابق کرکٹرز کی جانب سے شدید رد عمل کا اظہار کیا جارہا ہے ۔
قومی کرکٹ ٹیم کے سابق فاسٹ بولر عاقب جاوید کا افغانستان سے شکست کے بعد اپنے بیان میں کہنا تھا کہ آج کے میچ سے یہ ثابت ہوتا ہے کہ آپ نے کوئی اضافی کوشش نہیں کی، کوئی بھی ماٹھی سے ماٹھی ٹیم بھی 270رنز کر لیتی ہے۔
عاقب جاوید نے کہا کہ انہیں چاہئے تھا کہ 350 کا ٹارگٹ دیتے ، اگر آپ بیٹنگ لے رہے ہیں تو اسے آپ کو ثابت کرنا ہوگا، جس طرح سے افغانستان نے بیٹنگ کی ہے، انہیں اسکور بنانے میں کسی قسم کی کوئی مشکل نہیں ہوئی ۔
سابق فاسٹ بولر نے کہا کہ یہ سارے کے سارے ڈرے ہوئے ہیں ، بابر اعظم کی جگہ ایسا کپتان لانا چاہئے جو اپنی سوچ لے کر آئے، جو بغیر کسی ڈر کے میدان میں اترے ۔
عاقب جاوید نے شاہین شاہ آفریدی کی جانب اشارہ کرتے ہوئے کہا کہ آپ نے دیکھا ہوگا کہ اس نے کس طرح لاہور کو جتوایا تھا، اس نے ایسے فیصلے کئے تھے جو اس کے علاوہ کوئی نہیں کرسکتا تھا۔ عاقب جاوید نے حسن علی اور وسیم جونیئر کی بولنگ کو بھی تنقید کا نشانہ بنایا۔
واضح رہے کہ گزشتہ روز بھارت میں ہونے والے آئی سی سی کرکٹ ورلڈ کپ کے میچ پہلی بار افغانستان نے پاکستان کو 8 وکٹوں سے شکست دے دی۔
چنئی میں کھیلے گئے میچ میں پاکستان کی جانب سے دیا گیا 283 رنز کا ہدف افغانستان نے 49ویں اوورز میں 2 وکٹوں کے نقصان پر حاصل کرلیا۔
رحمان اللہ گرباز نے 65 رنز کی شاندار اننگز کھیلی، ابراہیم زدران 87 رنز بنا کر نمایاں رہے، رحمت شاہ 77 اور کپتان حشمت اللہ شاہدی48 رنز کے ساتھ ناٹ آؤٹ رہے۔
