کراچی : امیر جماعت اسلامی پاکستان سراج الحق نے کہا ہے کہ ہمارا جینا مرنا مسجد اقصیٰ اور فلسطین کیلئے ہے، مجاہدین نے مسجد اقصیٰ کے تحفظ کا حق ادا کیا۔
کراچی میں فلسطین مارچ سے خطاب کرتے ہوئے انہوں نے کہا کہ فلسطین کے مجاہدین نے مسجد اقصیٰ کے تحفظ کا حق ادا کیا اور میرا ایمان ہے کہ اس جذبے اور ایمان کے آگے نہ اسرائیل ٹھہر سکتا ہے اور نہ ہی اسرائیل کا سرپرست امریکا۔
سراج الحق نے کہا کہ امریکا اور اسرائیل کا وہی حشر ہوگا جو افغانستان میں نیٹو اور روسی افواج کا ہوا تھا، غزہ میں ان دونوں کی شکست یقینی ہے۔
ان کا کہنا تھا کہ فلسطینیوں کیلئے آواز بلند کرنا مسلم امہ کی ذمہ داری ہے،16سال سے غزہ کا محاصرہ جاری ہے، ہر دن بمباری ہوتی ہے، اسرائیلی بمباری سے ہزاروں فلسطینی شہری اور بے شمار مساجد شہید ہوئیں پھر بھی ہمارے مسلمان حکمران اسرائیلی مظالم پر بیدار نہیں ہوتے کچھ مذمتی بیانات جاری کرتے ہیں اور پھر ایک اور سانحے کا انتظار کرتے ہیں۔
کراچی – جماعت اسلامی کے زیراہتمام شاہراہ فیصل پر یکجہتی فلسطین مارچ میں شہر امڈ آیا۔ تاحد نگاہ لوگ موجود ہیں۔ #KarachiStands4FreePalestine pic.twitter.com/9WrBzodYbC
— Jamaat e Islami Pakistan (@JIPOfficial) October 15, 2023
امیر جماعت اسلامی نے کہا کہ اقوام متحدہ نے ایک ہزار بار فلسطینیوں کے حق میں قراردادیں منظور کی ہیں لیکن جب تک ان قراردادوں اور مذمتی بیانات کے پیچھے جہاد نہ ہو، شوق شہادت نہ ہو تو یہ کچھ بھی نہیں ہے۔
یہی وجہ ہے کہ 7 اکتوبر کو مجبور ہو کر ہمارے بھائیوں نے اسرائیل پر حملہ کیا اور لوگوں کو یہ پیغام دیا کہ لوگو اسرائیل ناقابل تسخیر نہیں ہے، لوگوں ایمان اصل طاقت ہے، ٹیکنالوجی یا امریکی بحری بیڑہ طاقت نہیں ہے، طاقت کل بھی اسلام تھا اور آج بھی اسلام ہے۔
ان کا کہنا تھا کہ آج مجھے کچھ لوگ معیشت کا درس دے رہے ہیں کہ ہماری معیشت اس وقت خراب ہے اور ہمیں معیشت کو بہتر بنانے پر توجہ دینی چاہیے، افغانوں سے جہاد کیا، امریکا نے ان پر ہزاروں ٹن بارود برسائے لیکن انجام کیا ہوا، امریکا کو شکست ہوئی اور ایک سال میں افغانستان کی کرنسی پاکستان کی کرنسی سے بہتر ہے، ان کی معیشت پاکستان سے بہتر ہے، رزق اور خوشحالی کی چابی اللہ کے ہاتھ میں ہے۔
