کراچی: سندھ میں شکار کے لیے آنے والے عرب شہزادے بغیر فیس ادا کیے روانہ ہوگئے، محکمہ جنگلی حیات کے 13 لاکھ ڈالر واجب الادا ہیں۔
تفصیلات کے مطابق عرب شہزادے شکار کرکے چلے گئے اور فیس ادا نہیں کی، عرب شہزادوں پر محکمہ جنگلی حیات کے 13 لاکھ ڈالر واجب الادا ہیں، سندھ حکومت نے فیس کی ادائیگی کے لیے وزارت خارجہ سے رابطے کا فیصلہ کرلیا ہے۔
نمائندہ اے آر وائی نیوز عاجز جمالی کے مطابق وفاقی حکومت نے پہلی بار عرب شہزادوں پر ایک لاکھ ڈالر فیس مقرر کی تھی، سندھ میں 13 عرب شہزادوں نے شکار کے لیے لائسنس لیے تھے۔
دبئی، متحدہ عرب امارات، قطر اور بحرین کے شہزادے شکار کرنے آئے تھے، بعض عرب شہزادے ابھی بھی جام شورو اور تھرپارکر میں موجود ہیں۔
کنزرویٹر وائلڈ لائف تاج محمد شیخ کے مطابق وفاقی حکومت کی ہدایت پر لائسنس فراہم کیے گئے تھے، فیس کی ادائیگی کے لیے سفارت خانوں کو خط لکھیں گے۔
تاج محمد نے کہا کہ عرب شہزادے دسمبر میں شکار کرنے آئے تھے، شکار کا سیزن نومبر سے جنوری تک ہے، لائسنس فیس کی رقم مذکورہ علاقوں کی ترقی پر خرچ کی جائے گی۔
محکمہ جنگلی حیات نے صوبائی حکومت کو صورت حال سے آگاہ کردیا ہے جبکہ سندھ حکومت نے فیس کی ادائیگی کے لیے وزارت خارجہ سے رابطہ کرنے کا فیصلہ کیا ہے۔
