ریاض : عرب لیگ نے اپنے غیرمعمولی اجلاس کے انعقاد کا اعلان کیا ہے جو آج بروز جمعرات منعقد ہوگا، اجلاس میں لبنان کی تازہ ترین صورتحال پر غور وخوص کیا جائے گا۔
سعودی میڈیا رپورٹ کے مطابق عرب لیگ کا ہنگامی اجلاس آج عراق کی درخواست پر طلب کیا گیا ہے، عرب لیگ میں مستقل نمائندوں کی سطح پراجلاس بلایا گیا ہے۔
رپورٹ کے مطابق اجلاس میں لبنان کی موجودہ صورتحال اور اسرائیلی جارحیت پر غور کیا جائے گا، عراق کے علاوہ دیگر عرب ممالک نے بھی ہنگامی اجلاس بلانے کی حمایت کی ہے۔
اس کے علاوہ اجلاس میں عرب ممالک کی لبنان کے ساتھ یکجہتی اور امدادی اقدامات پر تبادلہ خیال ہوگا۔ اجلاس میں لبنان میں بےگھر افراد اور پناہ گزینوں کے مسائل پر تبادلہ خیال ہوگا۔
