دی گریٹ انڈین کپل شرما شو کی اہم رکن ارچنا پورن سنگھ نے مشہور شو کے حوالے سے رونگٹے کھڑا کردینے والا انکشاف کیا ہے۔
بالی ووڈ اداکارہ ارچنا پورن سنگھ نے اپنے کیرئیر کا ایک دل دہلا دینے والا تجربہ شیئر کرتے ہوئے بتایا کہ انھیں ایک بار اپنی ساس کی موت کا علم ہونے کے باوجود کامیڈی شو کے سیٹ پر ہنسنے کا عمل جاری رکھنا پڑا تھا جو ان کے لیے تکلیف دہ تھا۔
ایک انٹرویو میں ارچنا نے کہا کہ انھوں نے محسوس کیا کہ انھیں اپنے پیشہ ورانہ وعدوں کا احترام کرنا ہوگا اور ناظرین کو تفریح فراہم کرنے کی اپنی ذمہ داری کو ترجیح دینا ہوگی۔
ارچنا پورن سنگھ نے کہا کہ میں نے تقریباً وہ قسط مکمل کر لی تھی اسی دوران مجھے اپنی ساس کی موت کی خبر ملی، اس لیے میں نے فوراً کہا کہ مجھے جانا ہے، لیکن ساتھ ہی مجھے معلوم تھا کہ مجھے اس قسط کو مکمل کرنا ہے۔
انھوں نے بتایا کہ شو کی ٹیم نے مجھے وہاں بیٹھنے اور ہنسنے کو کہا اور شو کے ارکان نے مجھے یہ بھی بتایا کہ جہاں کوئی لطیفہ ہوگا وہ اسکی ایڈیٹنگ کردیں گے۔
ارچنا نے مزید کہا کہ اب تصور کریں کہ میرے دماغ میں کیا چل رہا تھا، میری ساس ابھی فوت ہوئی ہیں میں کیسے ہنستی؟ مجھے نہیں معلوم اس صنعت میں 30-40 سال ہو چکے ہیں، تاہم آپ جانتے ہیں کہ پروڈیوسر کا پیسہ داؤ پر لگا ہوا ہے اس لیے آپ کام کو ادھورا نہیں چھوڑ سکتے۔
