کراچی : پاکستان شوبز کی معروف اداکارہ و ماڈل اریبہ حبیب نے اپنی شادی کے حوالے سے اپنے مداحوں کو بتایا ہے کہ ان کی سعدین عمران سے دوستی شادی کا مضبوط بندھن کیسے بنی۔
اے آر وائی ڈیجیٹل کے ڈرامے ’جلن‘ میں مینو کا مرکزی کردار نبھانے والی اداکارہ اریبہ حبیب نے اے آر وائی ڈیجیٹل کے پروگرام شان سحور میں شرکت کی اور میزبان ندا یاسر کے دلچسپ سوالات کے جوابات دیئے۔
انہوں نے بتایا کہ میں اور سعدین عمران گزشتہ 5 سال سے ایک دوسرے کو جانتے تھے اور ہماری دوستی پھر ہم نے سوچا کہ کیوں نہ اس دوستی کو ایک مضبوط رشتے میں بدل لیا جائے۔
انہوں نے بتایا کہ ہمارے رشتے سے متعلق میرے گھر والوں کو اس کا علم تھا اور بعد مین باقاعدہ سعدین کے گھر والوں نے رشتہ بھیجا اور اس طرح ہم شادی جیسے مقدس رشتے میں بندھ گئے۔
اریبہ حبیب نے کہا کہ شادی کے بعد مجھے جرمنی شفٹ ہونا تھا جس کی وجہ سے پیپر ورک مکمل کرنا تھا اور رخصتی کیلئے مجھے چار مہینے انتظار کرنا پڑا۔
یاد رہے کہ اداکارہ اریبہ حبیب گزشتہ سال سعدین شیخ کے ساتھ رشتہ ازدواج میں منسلک ہوئیں، اداکارہ کی شادی کی تصاویر اور ویڈیوز سوشل میڈیا پر وائرل بھی ہوئی تھیں۔
