سیاح جب دنیا گھومنے نکلتے ہیں تو ان کا سفر مہینوں یا پھر سال پر محیط ہوتا ہے لیکن ایک خاندان نے دنیا گھومنے کے لیے 2 دہائیاں لگا دیں۔
ارجنٹائن کا ایک جوڑا 1928 کی قدیم گاڑی میں دنیا کے 102 ممالک کا چکر لگا کر 22 سال بعد واپس اپنے گھر پہنچا اس دوران جوڑے کے ہاں 4 بچوں کی پیدائش ہوئی جو سفر میں ہی جوان ہوگئے۔
53 سالہ ہیرمن اور 51 سالہ سینڈریلیا سفر کے آغاز کے وقت نوجوان تھے اور اس سفر کے دوران ان کے 4 بچے بھی ہوئے جن کی عمریں گھر پہنچتے پہنچتے 19، 16، 14 اور 12 سال ہوچکی ہے۔
سفر کا آغاز شادی شدہ جوڑے نے کیا تھا لیکن گھر واپسی 4 نوجوان بچوں کے ساتھ ہوئی، جوڑے کی پہلی اولاد امریکا، دوسری ارجنٹائن واپسی پر، تیسری کینیڈا اور چوتھی اولاد آسٹریلیا میں ہوئی تھی۔
ارجنٹائن کے اس خاندان نے 25 جنوری 2000 میں ایڈوانچر کا آغاز کیا تھا جس کا ہدف دنیا بھر کا چکر لگانا تھا۔
5 براعظموں کے 102 ممالک کا چکر لگانے والے خاندان نے کُل 3 لاکھ 62 ہزار کلومیٹر سفر طے کیا اور واپس اس مقام پر پہنچے جہاں سے 22 سال قبل اس سفر کا آغاز کیا تھا۔