کراچی: صدر مملکت ڈاکٹر عارف علوی کا کہنا ہے کہ معاشی عدم استحکام ملک کا سب سے بڑا مسئلہ ہے۔ کراچی قومی معیشت میں 65 فیصد ٹیکس دیتا ہے۔

تفصیلات کے مطابق صدر مملکت عارف علوی نے کراچی چیمبر آف کامرس میں تقریب سے خطاب کرتے ہوئے کہا کہ میرا عہدہ صدارت، سفر کا راستہ تھا منزل نہیں، میری منزل خوبصورت پاکستان ہے۔

صدر مملکت کا کہنا تھا کہ ترکی کے صدر سے فری ٹریڈ ایگریمنٹ پر بات کی۔ ترکی کے ساتھ ہماری دوستی بڑھی اور تجارت کم ہورہی ہے۔ ترکی سے تجارت ایک ارب ڈالر سے کم ہو کر 60 کروڑ رہ گئی ہے۔

انہوں نے کہا کہ معاشی عدم استحکام ملک کا سب سے بڑا مسئلہ ہے۔ کراچی قومی معیشت میں 65 فیصد ٹیکس دیتا ہے۔ ایکسپورٹ میں اضافے کے بغیر معاشی استحکام ممکن نہیں۔

صدر مملکت کا مزید کہنا تھا کہ حکومتی پالیسیوں اور اقدامات سے معاشی بہتری کی امید ہے۔ کراچی سندھ ریونیو بورڈ کو 95 فیصد ٹیکس دیتا ہے۔ دیہی سندھ سے سندھ ریونیو بورڈ کو صرف 5 فیصد ٹیکس ملتا ہے۔