نائجیریا: افریقی ملک نائجیریا میں مسلح ڈاکوؤں نے ایک گاؤں پر حملہ کر کے 47 افراد کو گولیوں سے بھون دیا۔
غیر ملکی میڈیا کے مطابق ہفتے کی صبح نائجیریا کی شمال مغربی ریاست کٹسینا کے ایک گاؤں میں مسلح ڈاکوؤں نے حملہ کر کے 47 افراد کو ہلاک کر دیا۔
کٹسینا پولیس کا کہنا تھا کہ حملہ 300 سے زائد مبینہ ڈاکوؤں نے کیا، یہ حملہ غذائی اجناس چوری کرنے کے لیے کیا گیا تھا، جو حکومت نے کٹسینا کے علاقے میں تقسیم کی تھی۔
واقعے کے بعد پولیس، نائجیرین آرمی، ایئر فورس اور سول ڈیفنس کے اہل کار علاقے میں بھیجے گئے، پولیس ترجمان نے میڈیا کو بتایا کہ حملہ آوروں کو گرفتار کرنے کے لیے جنگل میں کومبنگ آپریشن کیا جا رہا ہے۔
رپورٹس کے مطابق حکومت نے کرونا وائرس لاک ڈاؤن میں مقامی افراد کی مدد کے لیے ریلیف کا سامان پہنچایا تھا، ڈاکوؤں نے گاؤں والوں سے اس سامان کا مطالبہ کیا تھا۔
خیال رہے کہ شمال مغربی نائجیریا میں گزشتہ ایک برس میں جرائم پیشہ گروہوں کے ہاتھوں سیکڑوں لوگ ڈکیتیوں کے دوران یا اغوا کر کے ہلاک کیے جا چکے ہیں، افریقا کے اس گنجان آباد ملک میں ایسے حملے سیکورٹی چیلنج بن چکے ہیں، کیوں کہ سیکورٹی فورسز بوکو حرام کے حملوں سے بھی نمٹ رہی ہیں۔
