اسلام آباد: وفاقی دارالحکومت میں مقیم قومی احتساب بیورو کے ڈپٹی ڈائریکٹر سلمان اکبر کے گھر ڈکیتی کی واردات ہوئی جس کا مقدمہ درج کرلیا گیا۔
نمائندہ اے آر وائی نیوز کے مطابق نیب راولپنڈی کے ڈپٹی ڈائریکٹر سلمان اکبر کے گھر ڈکیتی کی واردات کا واقعہ پیش آیا، چار مسلح افراد گزشتہ شب کھڑکی توڑ کر گھر میں داخل ہوئے اور طلائی زیورات سمیت نقدی لے کر فرار ہوگئے۔
نیب کے ڈپٹی ڈائریکٹر نے ڈکیتی کی واردات کا مقدمہ اسلام آباد کے تھانہ سبزی منڈی می درج کرادیا۔
ایف آئی آر کے متن میں درج کیا گیا ہے کہ ’چار مسلح افراد گزشتہ شب گھر میں کھڑکی توڑ کر داخل ہوئے جس پر ڈپٹی ڈائریکٹر نے مزاحمت کی تو مسلح افراد نے انہیں تشدد کا نشانہ بنایا اور یرغمال بنا کر طلائی زیورات سمیت نقدی لے کر فرار ہوگئے‘۔
پولیس نے واقعے کا مقدمہ درج کر کے کیس کی تحقیقات کا آغاز کردیا ہے، اس ضمن میں اطراف میں لگی سی سی ٹی وی فوٹیج کی مدد سے ملزمان کی شناخت کی جائے گی اور پھر انہیں جلد از جلد حراست میں لیا جائے گا۔
