آرمی چیف کی جانب سے شہید کسٹمز حکام کو بھرپور خراج عقیدت پیش کیا گیا ہے۔ سینئر فوجی کمانڈرز شہدا کے گھر بھی گئے۔
تفصیلات کے مطابق صوبہ خیبرپختونخوا میں پیش آنے والے 2 مختلف واقعات میں 8 کسٹمز حکام کی شہادتیں ہوئی تھیں۔ آئی ایس پی آر کی جانب سے جاری بیان میں بتایا گیا کہ آرمی چیف نے شہید ہونے والے کسٹمز حکام کو بھرپورخراج عقیدت پیش کیا ہے۔
ادارے نے جاری بیان میں بتایا کہ سینئر فوجی کمانڈرز شہدا کے گھروں میں گئے جہاں انھوں نے اہلخانہ سے اظہار یکجہتی کیا۔ شہدا کے اہلخانہ نے فوج کے اظہار یکجہتی پر اظہار تشکر کیا۔
آئی ایس پی آر کا کہنا تھا کہ شہدا اور غازی ہمارا فخر ہیں، تمام پاکستانی شہدا اور غازیوں کا مکمل احترام کرتے ہیں۔
جاری بیان میں کہا گیا کہ آج کا امن و استحکام شہدا کی مرہون منت ہے، پوری قوم شہدا کے خاندانوں کو سلام پیش کرتی ہے۔
