اسلام آباد : آرمی چیف جنرل قمرجاوید باجوہ تاریخ میں پہلی بار آج ایوان بالا کو بریفنگ دیں گے، سینیٹ کی ہول کمیٹی کا بند کمرہ اجلاس صبح دس بجے شروع ہوگا۔
تفصیلات کے مطابق ملکی پارلیمانی تاریخ کا اہم موڑ آگیا، پاک فوج کے سپہ سالار جنرل قمر جاوید باجوہ آج اہم قومی مسائل اور نیشنل سکیورٹی صورتحال سے متعلق سینیٹ کے ارکان کو تفصیلات بتائیں گے۔
آرمی چیف جنرل قمرجاوید باجوہ نیشنل سیکیورٹی صورتحال، خطے میں ہونے والی پیش رفت اور اپنے حالیہ بیرونی دوروں کی تفصیل بند کمرہ اجلاس میں بتائیں گے، ڈی جی ملٹری آپریشن بھی آرمی چیف کے ہمراہ ہوں گے۔
چیئرمین سینیٹ میاں رضا ربانی کی زیرصدارت سینیٹ کی ہول کمیٹی کا اجلاس آج صبح دس بجے شروع ہوگا، وزیردفاع خرم دستگیر کو بھی اجلاس میں شرکت کی دعوت دی گئی ہے۔
مزید پڑھیں : ہماری جانیں پاکستان کے لیے ہر وقت حاضرہیں‘ قمرباجوہ
واضح رہے کہ قائد ایوان راجہ ظفر الحق نے خطے کی صورتحال اور امریکہ کے کردار کی روشنی میں پالیسی گائیڈ لائن کی تیاری سے متعلق تحریک پیش کی تھی۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر ضرور شیئر کریں۔
