راولپنڈی : آرمی چیف جنرل قمر جاوید باجوہ سے افغان سفیر شکراللہ عاطف نے ملاقات کی، ملاقات میں باہمی دلچسپی اورعلاقائی سیکیورٹی صورتحال پربات چیت کی گئی۔
پاک فوج کے شعبہ تعلقات عامہ آئی ایس پی آر کے مطابق پاک فوج کے سپہ سالار جنرل قمر جاوید باجوہ سے افغانستان کے سفیر شکراللہ عاطف مشعل نے ملاقات کی، یہ ملاقات جی ایچ کیو راولپنڈی میں ہوئی۔
ملاقات میں باہمی دلچسپی اورعلاقائی سیکیورٹی صورتحال پربات چیت کی گئی، ملاقات میں افغانستان میں جاری امن کےعمل پربھی تبادلہ خیال کیا گیا، اس موقع پر دوطرفہ تعلقات میں مزید بہتری پر زور دیا گیا اور دونوں ملکوں کے درمیان باہمی اعتماد پر اتفاق کیا گیا۔
آئی ایس پی آر کے مطابق اس موقع پر افغان سفیر نے کہا کہ افغانستان میں فروغ امن کیلئے پاکستان کی کوششیں قابل تعریف ہیں۔ انہوں نے دونوں ملکوں کے درمیان تعلقات میں بہتری پر آرمی چیف کا شکریہ ادا کیا۔
