سوات : آرمی چیف جنرل راحیل شریف نے سوات میں فوجی چھاؤنی کے قیام کا سنگِ بنیاد رکھ دیا۔
آئی ایس پی آر کے مطابق آرمی چیف جنرل راحیل شریف شدت پسندوں سے پاک کرائے گئے خوبصورت شہر سوات کے دورے پر پہنچے، جہاں انہوں نے فوجی چھاونی کا سنگ بنیاد رکھا۔
General Raheel Sharif, COAS visited Mangora, Kanju and Khwazakhela in Swat today. During the visit, COAS along… https://t.co/WozRsRJ6vD
— ISPR (@ISPR_Official) November 11, 2016
سنگ بنیاد کی تقریب سے خطاب میں آرمی چیف نے کہا کہ خطے سے دہشت گردی کے خاتمے کے لئے سوات کے عوام نے بڑی قربانیاں دیں اورسوات کے عوام نے دہشتگردوں کونکال باہرکرنے کیلئے فورسزکابھرپورساتھ دیا۔
جنرل راحیل شریف نے کہا کہ فوجی چھاؤنی سوات میں دیرپاامن اور استحکام میں معاون ثابت ہوگی اور اس چھاؤنی سے قانون نافذ کرنے والے تمام اداروں کا اعتماد مستحکم ہوگا۔
انہوں نے کہا کہ فاٹا اور مالاکنڈ میں ترقیاتی کام فوج کی ترجیح ہے۔
آرمی چیف نے یو اے ای کے تعاون سے تعمیر ہونے والے شیخ زید اسپتال کا بھی افتتاح کیا، راحیل شریف کو جنرل آپریشنل کمانڈر آصف غفور نے بریفنگ دی۔
واضح رہے کہ سوات میں 2009ء میں طالبان کے خلاف پاکستانی فوج نے ایک بھرپور کارروائی شروع کی تھی، جس کے بعد سے اس علاقے سے دہشت گردوں کا صفایا کر دیا گیا۔
