اسلام آباد: آرمی چیف جنرل قمر جاوید باجوہ نے چیئرمین پاکستان کرکٹ بورڈ نجم سیٹھی کو خط لکھ کر پاکستان سپر لیگ کے کامیاب انعقاد پر ان کی تعریف کی۔
تفصیلات کے مطابق آرمی چیف جنرل قمر جاوید باجوہ نے چیئرمین پاکستان کرکٹ بورڈ نجم سیٹھی کے لیے تعریفی خط لکھا ہے۔
آرمی چیف نے پاکستان سپر لیگ اور ویسٹ انڈیز سے سیریز پر نجم سیٹھی اور ٹیم کو مبارک باد دی۔
اپنے خط میں آرمی چیف کا کہنا تھا کہ یہ نمایاں کامیابیاں پاکستان کرکٹ کے مستقبل کے لیے اہم ہیں۔ کامیابیاں سیکیورٹی صورتحال کی امیج بحالی کے لیے بھی اہم ہیں۔
ان کا کہنا تھا کہ پرامن امیج اجاگر کرنے کے لیے پاک فوج پی سی بی کے ساتھ ہے۔
آرمی چیف نے پی سی بی کے تمام عہدیداران کے لیے نیک خواہشات کا اظہار بھی کیا۔
خیال رہے کہ پاکستان سپر لیگ کا تیسرا ایڈیشن دبئی اور شارجہ میں منعقد کیا گیا تھا تاہم اس کے اختتامی 2 میچز صوبہ پنجاب کے دارالحکومت لاہور جبکہ فائنل سندھ کے دارالحکومت کراچی میں کھیلا گیا۔
بعد ازاں ویسٹ انڈیز کی ٹیم بھی پاکستان آئی جسے ساتھ 3 ٹی 20 میچز کی سیریز کراچی میں منعقد کی گئی۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
