راولپنڈی : ڈی جی آئی ایس پی آر میجر جنرل آصف غفور نے کہا ہے کہ آرمی چیف قمر باجوہ ایران کے دورے پر تہران پہنچ گئے ہیں جہاں وہ عسکری اور سیاسی قیادت سے ملاقات کریں گے.
تفصیلات کے مطابق آرمی چیف قمر جاوید باجوہ خطے کی بدلتی صورت حال اور قیام امن کے لیے پڑوسی ممالک کے درمیان باہمی تعاون اور رابطے میں فروغ کے لیے افغانستان کے بعد اب ایران کے دورے پر تہران پہنچے ہیں.
ڈی جی آئی ایس پی آر میجر جنرل آصف غفور نے سماجی رابطے کی ویب سائٹ ٹویٹر پر اپنے ایک پیغام میں بتایا ہے کہ آرمی چیف جنرل قمرجاوید باجوہ ایران کے سرکاری دورے پر آج تہران پہنچ گئے ہیں.
COAS arrived Tehran, Iran on official visit. Scheduled to meet Iranian civilian and military leadership.
— Maj Gen Asif Ghafoor (@OfficialDGISPR) November 5, 2017
ڈی جی آئی ایس پی آر کے مطابق آرمی چیف قمر باجوہ اپنے دورے کے دوران ایران کی عسکری اور سیاسی قیادت سے ملاقات کریں گے اور دوطرفہ تعلقات سمیت خطے میں قیام امن کے لیے ضروری اقدامات پر تبادلہ خیال کیا جائے گا.
خیال رہے اس سے قبل آرمی چیف قمر جاوید باجوہ افغانستان کا دورہ بھی کر چکے ہیں اور سرحدی امور سمیت دہشت گردی کے خلاف جنگ میں معلومات کے تبادلے اور مشترکہ کاوشوں پر اتفاق کیا گیا تھا جب کہ اب دورہ ایران بھی خطے میں پائیدار امن کے لیے کاوشوں کا حصہ ہے.