ایبٹ آباد: پاک فوج کے شعبہ تعلقات عامہ کے ادارے کا کہنا ہے کہ آرمی چیف جنرل قمر جاوید باجوہ نے بلوچ رجمنٹ سینٹر ایبٹ آباد کا دورہ کیا، آرمی چیف نے بلوچ رجمنٹ کے کردار اور کامیابیوں کو سراہا۔
آئی ایس پی آر کے مطابق آرمی چیف جنرل قمر جاوید باجوہ نے ایبٹ آباد میں بلوچ رجمنٹ کا دورہ کیا ہے جہاں انھوں نے بلوچ رجمنٹ کے کرنل کمانڈنٹ انسٹالیشن کی تقریب میں شرکت کی، تقریب میں لیفٹیننٹ جنرل اظہر عباس کو کرنل کمانڈنٹ بلوچ رجمنٹ کے بیجز لگائے گئے۔
تقریب میں حاضر سروس اور ریٹائرڈ افسران کی بڑی تعداد نے شرکت کی، بلوچ رجمنٹ آمد پر آرمی چیف نے یاد گار شہدا پر حاضری دی اور پھول چڑھائے۔
آئی ایس پی آر کا کہنا ہے کہ بلوچ رجمنٹ کا داخلی سیکورٹی آپریشنز میں کردار گراں قدر ہے۔
یہ بھی پڑھیں: غیرملکی سفارت کاروں اورمیڈیا کا ایل اوسی جورا سیکٹر کا دورہ
واضح رہے کہ آج غیر ملکی سفیروں اور میڈیا نے لائن آف کنٹرول کا دورہ کر کے بھارتی اشتعال انگیزیوں سے متاثرہ گھر دیکھے، ڈی جی آئی ایس پی آر نے بریفنگ دیتے ہوئے کہا بھارتی آرمی چیف کا جھوٹا دعویٰ بے نقاب ہو چکا ہے۔
غیر ملکی سفارت کاروں اور میڈیا نمایندہ گان نے مقامی بازار میں دکان داروں اور شہریوں سے بات چیت کی، ان کو بھارتی آرٹلری کے گولے دکھائے گئے، بھارتی فوج کے پھینکے گئے گولے آزاد کشمیر کی شہری آبادی پر گرے تھے۔
